"Böyük Qayıdış sürətlə və uğurla gerçəkləşir"

Mayın 10-da Prezident İlham Əliyevin iştirakı ilə Ağdam rayonunun Kəngərli kəndinin birinci mərhələsinin açılışı müasir tariximizin daha bir parlaq səhifəsinə çevrildi.

İşğaldan azad olunan digər ərazilərdəki kimi, Ağdam rayonunda da genişmiqyaslı quruculuq işləri aparılır. Bu işlərin davam etdiyi yerlərdən biri də rayonun Kəngərli kəndidir. Şəhər mərkəzindən 6 kilometr məsafədə yerləşən bu kəndin təməlini 2022-ci il oktyabrın 4-də Prezident İlham Əliyev qoyub. Kəngərli kəndi 2544 nəfər üçün planlaşdırılıb. Layihələndirilən ümumi ərazi 177 hektardan çoxdur. Ümumilikdə kənddə 2 mərhələ üzrə 632 fərdi evin inşası nəzərdə tutulub. Bu kənddə də əhalinin məşğulluğunun təmin edilməsi üçün hər cür şərait yaradılıb, iqtisadi, təhsil, sosial, mədəni və məişət təyinatlı müxtəlif obyektlər tikilib. Kənddaxili yollar, elektrik, rabitə, su xətləri çəkilib, qaz təchizatı təmin olunub.

Prezident eyni zamanda Kəngərli kənd tam orta məktəbinin binasının və Ağdamın Kəngərli kəndində 120 yerlik körpələr evi - uşaq bağçasının açılışını edib. Ağdamın Kəngərli kəndində inşa edilən orta məktəb binasının 30 sinif otağında 484 şagird təhsil alacaq.

Millət vəkili Səbinə Salmanova deyir ki, bir zamanlar "Qafqazın Xirosiması", "Kabus şəhər" adlandırılan Ağdam yenidən dirçəlir və çiçəklənir: "İşğal dövründə tamamilə viran qoyulan Ağdam artıq yeni inkişaf mərhələsindədir. Prezidentin Ağdama səfəri, rayonun Kəngərli kəndində fərdi evlərin və infrastrukturun bərpası sahəsində görülən işlərlə tanış olması, sonra kəndə köçən bir qrup sakinlə görüşü mühüm əhəmiyyət kəsb edir. Prezident görüşdə Ağdam sakinlərinə növbəti şad xəbəri də verdi. İlham Əliyev qeyd etdi ki, rayonun Xıdırlı kəndi də, demək olar, açılışa hazırdır və yaxın aylarda orada da həyat qaynayacaq. Ölkə başçısı rayona səfəri çərçivəsində, həmçinin Ağdam vağzal kompleksinin və Ağdam Muğam Mərkəzinin açılışında da iştirak etdi. Bütün bunlar onu deməyə əsas verir ki, bir neçə ildən sonra Ağdam öz gözəlliyi və bənzərsizliyi ilə hər kəsi valeh edəcək".

Millət vəkili Könül Nurullayeva qeyd edib ki, işğaldan azad olunan ərazilərdə aparılan bərpa-quruculuq işləri regionun simasını tamamilə dəyişib: "Ağdamda Sarıcalıdan sonra artıq ikinci kənd - Kəngərli də tam bərpa olunub və doğma sakinlərin burada məskunlaşması üçün hər cür şərait yaradılıb. Bu, azad olunmuş ərazilərdə bərpa olunan 14-cü yaşayış məntəqəsidir. Prezident İlham Əliyenin Kəngərli sakinləri ilə görüşdə də söylədiyi kimi, təkcə Ağdamda yox, demək olar ki, o vaxt işğal altında olan bütün torpaqlarda Ermənistan dövləti tərəfindən məqsədyönlü siyasət aparılırdı ki, heç vaxt azərbaycanlılar bu bölgəyə qayıtmasınlar. Çünki həm Ermənistan, həm də onun havadarları işğalın əbədi qalmasına çalışırdı. Amma onlar Azərbaycan xalqının heç vaxt işğalla barışmayacağını, Azərbaycan dövlətinin güc toplayaraq düşməni öz torpağından qovacağını hesablaya bilməmişdilər. Ölkə başçısı bir daha bildirdi ki, siyasi iradə, iqtisadi güc, müstəqil siyasət, güclü ordu, vətənpərvərlik və milli ruhda tərbiyə olunan, bu torpaqları heç vaxt görməyən gənc nəsil bizim böyük Qələbəmizi şərtləndirdi. Azərbaycan elə bir tarix yazıb ki, son 5 ildir, hər kəs bundan danışır. Qarabağ və Şərqi Zəngəzurun yenilənən siması da dünyanın diqqətindədir".

K.Nurullayeva qeyd edib ki, bərpa-quruculuq işləri çərçivəsində Şuşanı Xankəndi ilə birləşdirən "Kanat yolu" layihəsini dövlət başçısı ilk dəfə ictimaiyyətə açıqladı: "Laçın və Kəlbəcərdə də eyni layihə var. Bu isə həm turizm baxımından, həm də insanların rahat gediş-gəlişi üçün çox gözəl bir vasitə olacaq. Yəni dövlət keçmiş məcburi köçkünlərin firavan və təhlükəsiz qayıdışını hərtərəfli təmin edir".

Millət vəkili Vüqar Rəhimzadə qeyd edib ki, sürətli bərpa işləri onu göstərir ki, tezliklə bütün keçmiş məcburi köçkünlər öz doğma torpaqlarına qayıdacaq, bu ərazilərimizdə yeni həyat başlayacaq. Kəngərli kəndi bərpa edilən sayca 14-cü yaşayış məntəqəsidir. Ağdam rayonunun Sarıcalı və Kəngərli kəndləri artıq sakinlərinə qovuşub. Xıdırlı kəndi də açılışa hazırdır. İlham Əliyev bu müjdəni də çatdırdı ki, yaxın aylarda orada da həyat qaynayacaq.

Millət vəkilinin sözlərinə görə, artıq 30 ilin dağıntılarını bu gün müasir standartlara cavab verən bərpa-quruculuq işləri əvəzləyir. İkinci Qarabağ müharibəsindən keçən dörd il yarım ərzində quruculuq işləri göz qabağındadır. O cümlədən Ağdam şəhərində də bunu görmək mümkündür. İşğal dövründə Ermənistan dövləti məqsədyönlü siyasət apararaq bütün şəhər və kəndlərimizi yerlə-yeksan etmişdi. Buraya və azad olunmuş digər bölgələrə səfər edən xarici qonaqlar öz təəccübünü və bir çox hallarda hiddətini gizlədə bilmirlər. Onlara başa salanda ki, bu dağıntılar müharibə zamanı yox, atəşkəs zamanı törədilmişdir, əlbəttə ki, erməni faşizminin eybəcər sifəti açıq-aydın görünür. 30 il ərzində hər gün bu müqəddəs azadlıq gününü yaxınlaşdırırdıq".

Vüqar Rəhimzadə vurğulayıb ki, tarixi Zəfərimiz, ərazi bütövlüyümüzün və suverenliyimizin tam bərpa olunması yeni reallıqlar yaradaraq Azərbaycanın yeni dövrə qədəm qoymasını şərtləndirdi. Vətən müharibəsində Qələbəmizdən və suverenliyimizin tam bərpasından sonra müstəqillik tariximizdə ilk dəfə olaraq bütün ölkə ərazisində prezident, parlament və bələdiyyə seçkiləri keçirildi. Qarabağımız və Şərqi Zəngəzurumuz bu gün iqtisadi, siyasi, diplomatik mərkəz kimi dünyanın diqqətindədir. Bu məkanda keçirilən hər bir beynəlxalq əhəmiyyətli tədbir Zəfərimizin yaratdığı reallıqların təbliğidir. Bu gün azad Qarabağda azad yaşayırıq. Artıq Xankəndidə Qarabağ Universiteti fəaliyyət göstərir, bu şəhərdə 8 mindən çox insan yaşayır. Şuşanı Xankəndi ilə birləşdirən "Kanat yolu" layihəsi üzərində iş gedir. Laçın şəhərində kanat yolunun tikintisinə bu il başlanılması nəzərdə tutulur. Kəlbəcərdə də belə layihə var. Təbii ki, bu sıralamanı daha da artıra bilərik. Bütün bunlar təbii ki, Vətən müharibəsində və lokal xarakterli antiterror tədbirlərində tam və mütləq Qələbəmizin təqdimatlarıdır.

Millət vəkili Hikmət Babaoğlunun sözlərinə əsasən, son 5 ildə qarşımızda duran ən böyük milli vəzifələrdən biri işğaldan azad olunmuş ərazilərimizə Böyük Qayıdışı təmin etmək və ərazilərimizdə məskunlaşma ilə bağlı infrastrukturu yaratmaqdan ibarət idi. İlk növbədə xüsusi proqram çərçivəsində Azərbaycan dövləti bütün işğaldan azad olunmuş ərazilərimizdə təhlükəsizliyi təmin etmək üçün mümkün təhlükə mənbələrini, o cümlədən minaları təmizlədi. ardınca yol kommunikasiya elektrik, su və digər vasitələrin inşa edilməsinə başlandı: "Nəticədə yüzlərlə kilometr yollar çəkildi, körpülər salındı, onlarla su elektrik stansiyası inşa edildi, hava limanları inşa edildi. Şəhər və kəndlərimizin qəbul olunmuş proqram üzrə şəhərsalma planları təsdiq edildi. Həmin bu proses müasir tikinti texnologiyalarına əsaslanan ən müasir formada həyata keçirildi. Ağıllı şəhərlər, ağıllı kəndlər formasında qayıdacaq vətəndaşlarımızın bütün rahatlığını təmin olunması üçün lazım olan zəruri tədbirlər görüldü".

Böyük Qayıdış proqramının sürətlə və uğurla gerçəkləşdiyini deyən H.Babaoğlu qeyd edib ki, 2026-cı ildə Böyük Qayıdışın birinci hissəsi başa çatacaq. Hazırda bu nəhəng dövlət proqramı üzrə proseslər intensiv olaraq davam etdirilməkdədir.

Millət vəkili qeyd edib ki, Prezidentin Ağdama səfər etməsi, Bakı-Ağdam dəmiryol inşasının başa çatması, Ağdam dəmiryol vağzalı stansiyasının açılışının edilməsi, həmçinin Ağdam sənaye parkı və digər müəssisələrinin açılış edilməsi Ağdamın böyük şöhrətini özünə qaytarılması istiqamətində atılan addımlardır. Müasir şəhərlərimizə daha da müasir şəkildə qayıdırıq.

Millət vəkili Azər Badamov bildirib ki, ermənilər Ağdamı taladılar, dağıtdılar və Qafqazın Hirosimasına çevirdilər. Çünki onlar bilirdilər ki, bir gün azərbaycanlılar öz doğma yurdlarına qayıdacaqlar. Məhz ona görə də nə qədər mümkündür apardılar. Amma Müzəffər Ali Baş Komandanın rəhbərliyi altında rəşadətli ordumuz Ağdamı da, Şuşanı da, Xankəndini də və digər əraziləri düşmənlərdən təmizləyərək ərazilərin suverənliyini təmin etdi.

Azər Badamov dediyinə görə, bu gün Prezident İlham Əliyevin rəhbərliyi ilə Ağdama və digər ərazilərə yeni ruh, yeni nəfəs qayıdır: "Təbii ki, bunu görülən quruculuq və abadlıq işlərində, öz doğma yurdlarına qayıdan keçmiş məcburi köçkünlərin sevinc göz yaşları ilə görünməkdədir. Bu baxımdan 10 mayda Prezident İlham Əliyev və Birinci vitse-prezident Mehriban Əliyevanın Ağdama səfəri tarixin yeni bir səhifəsinə imza atıldığının təsdiqidir. Torpaqlara əsl sahibləri qayıdanda çiçəklənir və inkişaf edir. Bu baxımdan dövlət başçımızın Ağdamda açılışlarını etdiyi Dəmir Yolu və Avtovogzal Kompleksi, Muğam Mərkəzi ağdamlıların və Ağdama gələcək qonaqların rahatlığını, mədəni istirahətini təmin edəcəkdir. Ağdama ağdamlılarla bir yerdə milli-mənəvi dəyərlər, muğam, mədəniyyət, musiqi də qayıdır. Həm də Ağdamın növbəti yaşayış məntəqəsi olan Kəngərli kəndinin birinci yaşayış kompleksinin açılışı, bu kənddə yaradılan müasir şərait azad olunmuş torpaqların addım-addım cənnətə çevrilməsidir. İnşa olunmuş müasir məktəb, uşaq bağçası, inzibati binalar və sair Kəngərliyə qayıdan uşaqların təhsil almasına, layiqli vətəndaş kimi böyüməsinə imkan verəcəkdir. Beləliklə, birmənalı şəkildə demək olar ki, Ağdam torpaqları da çiçəklənməklə öz xoşbəxtliklərinə qovuşur".

Sevinc QARAYEVA

525-ci qəzet .- 2025.- 16 may(№84).- S.14.