“İnklüziv harmoniyalar - muzeydə rənglər və səslər” adlı tədbir-sərgi təşkil olunub

Mayın 18-i dünyada Beynəlxalq Muzeylər Günü kimi qeyd olunur. Beynəlxalq Muzeylər Şurası (ICOM) tərəfindən xalqlar arasında mədəni mübadilə və əməkdaşlığın inkişafına kömək məqsədi ilə təsis olunmuş bu gün hər il müxtəlif deviz altında keçirilir. Bu il Beynəlxalq Muzeylər Gününün devizi “Sürətlə dəyişən icmalarda muzeylərin gələcəyi”dir.

AZƏRTAC xəbər verir ki, bu münasibətlə L. və M.Rostropoviçlərin Ev-muzeyi və Bakı şəhəri 1 nömrəli Uşaq-gənclər inkişaf mərkəzinin birgə təşkilatçılığı ilə “İnklüziv harmoniyalar - muzeydə rənglər və səslər” adlı tədbir-sərgi təşkil olunub.

Tədbirin keçirilməsində məqsəd muzeylərin inklüzivliyi, davamlı şəhər inkişafına verdiyi töhfəni və mədəni irsin qorunmasını təşviq edən mədəniyyət mərkəzləri kimi rolunu vurğulamaq, həmçinin fiziki məhdudiyyətli uşaqların cəmiyyətə adaptasiyasını, sosial-mədəni tədbirlərdə fəal iştirakını təmin etməkdir.

İştirakçıların ifasında müxtəlif xalqların mahnı və rəqsləri - M.Maqomayevin “Azərbaycan” mahnısı, həmçinin italyan mahnısı “O sole miyo”, L.Bethovenin “Sonata sol major” klassik əsəri, Çin xalq mahnısı və “Nəlbəki” rəqsi, türk, Ukrayna, gürcü xalq rəqsləri təqdim olunub. Bununla yanaşı rəngkarlıq, təsviri sənət və dizayn dərnəklərinin üzvlərinin “Beynəlxalq Muzeylər Günü”nün builki devizinə həsr etdikləri əl işlərindən ibarət sərgi nümayiş etdirilib.

525-ci qəzet .- 2025.-20 may(№86).- S.9.