Milli Kitabxanada “Əməkdar mədəniyyət işçisi Vaqif Bəhmənli” adlı kitab sərgisi açılıb

Milli Kitabxanada Müasir Azərbaycan poeziyasının tanınmış nümayəndəsi, şair, tərcüməçi, publisist, Əməkdar mədəniyyət işçisi Vaqif Bəhmənlinin 70 illik yubileyi münasibətilə “Əməkdar mədəniyyət işçisi Vaqif Bəhmənli” adlı kitab sərgisi açılıb.

Sərgidə müəllifin Azərbaycan və xarici dillərdə əsərləri, redaktoru olduğu, ön söz yazdığı, məsləhətçisi və tərcüməçisi olduğu kitablar, eləcə də həyat və yaradıcılığı haqqında ədəbiyyatlar, jurnal və dövri mətbuat materialları nümayiş olunur.

Qeyd edək ki, Vaqif Bəhmənli (Vaqif İttifaq oğlu Quliyev) 1955-ci il may ayının 23-də Füzuli rayonunun Böyük Bəhmənli kəndində anadan olub. 1972-ci ildə doğulduğu kənddə orta məktəbi bitirib. 1973-1978-ci illərdə Azərbaycan Dövlət Universitetinin (indiki BDU) jurnalistika fakültəsində təhsil alıb.

Vaqif Bəhmənlinin şeir və məqalələrdən ibarət 50-dən çox kitabı işıq üzü görüb. Çox sayda beynəlxalq poeziya və ədəbiyyat festivallarında, ədəbi-elmi konfrans və simpoziumlarda, Beynəlxalq kitab sərgi yarmarkalarında iştirak edib.

Vaqif Bəhmənli obrazlı düşüncə şairidir. Türk bədii düşüncəsinin ənənələrinə arxalanmaq, insanın hiss və duyğularını canlandırmaq üçün yeni poetik məqsədlərə sənətkarlıqla cəhd etmək, özünəxas bədii deyim tərzi, güclü kalorit onun yazdıqlarını başqalarından fərqləndirir.

525-ci qəzet .- 2025.- 22 may(№88).- S.9.