"Köhnəlməyən xiffət"dən "Yurt hasreti"nə

ŞAİR-PUBLİSİST NƏZAKƏT MƏMMƏDOVANIN YENİ KİTABLARI TƏQDİM OLUNUB

Yazıçılar Birliyinin (AYB) "Natəvan" klubunda Azərbaycan Respublikası "Xatirə Kitabı" Redaksiyasının baş redaktoru, "Yada düşdü" jurnalının təsisçisi və baş redaktoru, şair, publisist Nəzakət Məmmədovanın "Köhnəlməyən xiffət" və "Yurt hasreti" (Türkiyə türkcəsində) kitablarının təqdimat mərasimi keçirilib.

AYB-nin rəhbərliyi, müəllifin qələm dostları, ictimaiyyət nümayəndələri və jurnalistlər iştirak edən tədbiri giriş sözü ilə "Qobustan" jurnalının baş redaktoru, yazıçı, dramaturq Pərvin Nurəliyeva açıb. N.Məmmədovanın yaradıcılığından, yeni kitablarından danışaraq onun müasir ədəbiyyatımızdakı dəst-xətti, əsərlərinin fərqli cəhətləri barədə fikirlərini bölüşüb.

Türkiyəli şair-tərcüməçi, "Türk ədəbiyyatı" dərgisinin baş redaktoru, N.Məmmədovanın "Yurt hasreti" kitabının tərcüməçisi İmdat Afşar çıxışında müəlliflə tanışlığından danışıb, onun yaradıcılığını yüksək qiymətləndirib. Çıxışından sonra İ.Afşar Nəzakət Məmmədovaya tanınmış türk şairi Ahmad Kabaklının 100 illiyi münasibətilə təsis olunan "Ahmad Kabaklı" medalını təqdim edib.

Xalq yazıçısı Elmira Axundova N.Məmmədovanın Respublika Xatirə Kitabı Redaksiyasına uğurla rəhbərlik etdiyini bildirib, onun həm şair, həm publisist, həm də bir rəhbər kimi yüksək keyfiyyətlərini dilə gətirib.

AYB-nin katibi, yazıçı Elçin Hüseynbəyli bildirib ki, N.Məmmədova öz şəxsiyyətini, kimliyini yaradıcılığı ilə dəqiq ifadə edir.

"Türk ədəbiyyatı" dərgisinin əməkdaşı Səadət Örməci, Əməkdar jurnalistlər Zemfira Məhərrəmli, Zöhrə Əliyeva, aktrisa, qiraətçi Zülfiyyə Eldarqızı, şairlər Şövkət Zərrin Horovlu, Adilə Nəzər, Faiq Balabəyli, Mahcamal, Arzu Nehrəmli, Rəfail Tağızadə, Aysel Xanlarqızı, Kəmalə Abıyeva, Respublika Xatirə Kitabı Redaksiyasının əməkdaşı Hikmət Məlikzadə, professor Maarifə Hacıyeva, ədəbiyyatşünas, filologiya elmləri doktoru Lütfiyyə Əsgərzadə, yazıçı-publisistlər Xanım Aydın, Şahanə Müşfiq, bədii qiraətçi Ülviyyə Əbülfəzqızı, yazıçı və tərcüməçi Kamran Nəzirli, F.Köçərli adına Uşaq Kitabxanasının müdiri Şəhla Qəmbərova və başqaları N.Məmmədovanın yaradıcılığından söz açıb, onu yeni kitabları münasibətilə təbrik ediblər.

Sonda müəllif çıxış edərək kitabların nəşrində və tədbirin təşkilində zəhməti olan hər kəsə təşəkkürünü bildirib, "Köhnəlməyən xiffət" kitabından şeirlər səsləndirib.

Şahanə MÜŞFİQ

525-ci qəzet .- 2025.- 23 may(№89).- S.12.