Laçında Zəfər təntənəsi

Mayın 28-də Laçın şəhərində keçirilən Müstəqillik Gününə həsr olunmuş rəsmi tədbir təkcə Azərbaycanın dövlətçilik tarixində yox, eyni zamanda minlərlə insanın şəxsi taleyində də yeni bir səhifənin başlanğıcı oldu. Bu günün yalnız təqvimdəki əlamətdar bir tarix deyil, həm də milli dirçəlişin və azadlıq fəlsəfəsinin konkret məkan və zamanla birləşdiyi an kimi yadda qalması, tədbirin məhz Laçında keçirilməsi xüsusi siyasi və mənəvi anlam kəsb edirdi.

30 ildən artıq bir müddətdə doğma yurd yerlərindən didərgin düşmüş, hər bayramda gözü dağlarda, ruhu torpağında qalmış on minlərlə azərbaycanlının öz torpağına qayıdışı reallıq, möhkəmlənmiş dövlət iradəsi, xalqın səbir və qürurla dolu qələbəsidir. Bu tədbir Azərbaycan dövlətinin öz xalqına verdiyi vədin yerinə yetirilməsi, ədalətin tarixi torpaqlar üzərində bərpası, milli kimliyin tam və bütöv şəkildə təsdiqi demək idi. Prezident İlham Əliyevin tədbirdəki çıxışında səsləndirdiyi "Bu gün biz Laçında, Azərbaycanın azad olunmuş torpağında Müstəqillik Gününü qeyd edirik. Bu, tarixdir. Bu, Zəfərimizin bəhrəsidir. Bu gün biz müstəqil, qalib, azad və güclü dövlətdə yaşayırıq" sözləri bu bayramın təkcə simvolik deyil, həm də real siyasi nəticələrin təzahürü olduğunu ifadə edirdi.

Bu qürurlu gündə üç dövlətin Laçının səmalarında ucalan bayrağı diplomatik əməkdaşlığın nümunəsi olmaqla bərabər, həm də birgə ədalət anlayışının simvolu idi. Türkiyə Prezidenti Rəcəb Tayyib Ərdoğan çıxışında Azərbaycan xalqının mübarizəsini "ədalət uğrunda sarsılmaz bir iradə nümunəsi" adlandıraraq bildirdi: "Azərbaycanın mübarizəsi təkcə öz haqqı üçün deyil, bölgədə sülh, sabitlik və ədalətin bərpası üçün aparılmış bir mübarizədir. Biz bu gün burada olmaqla tarixə şahidlik edirik". Onun bu sözləri qardaş xalqlar arasında tarixi həmrəyliyin və ortaq gələcəyin təsdiqi idi.

Pakistan İslam Respublikasının Baş naziri Məhəmməd Şahbaz Şərif isə öz növbəsində Azərbaycanın haqq işinə verdikləri mənəvi və siyasi dəstəyi vurğulayaraq dedi: "Azərbaycanın bu Zəfəri təkcə sizin deyil, bizim də qələbəmizdir. Biz burada olmaqla azadlığın təntənəsinə, qardaşlığın gücünə şahidlik edirik".

Dövlət başçılarının öz çıxışlarında səsləndirdikləri fikirlər də göstərdi ki, Laçında keçirilən bu tədbir beynəlxalq siyasi kontekstdə mühüm simvolik əhəmiyyət daşıyır. Azərbaycanın öz ərazi bütövlüyünü bərpa etməsi və azad olunmuş ərazilərdə suveren hakimiyyətini təmin etməsi regionda yeni bir təhlükəsizlik arxitekturasının əsasını qoyub və bu tədbir həmin prosesin növbəti mərhələsini - mülki həyatın, ictimai sabitliyin və tarixi yaddaşın yenidən bərpa olunmasının zirvəsini təşkil edir. Bu gün Laçına köçən hər bir vətəndaş sadəcə bir evə qayıtmadı, həm də yeni, şərəfli bir tarixin növbəti səhifələrini yazdı. Bu qayıdışın arxasında duran illərlə səssizcə çəkilən iztirab, qurulan ümid, vətən üçün edilən dualar, müvəqqəti düşərgələrdə böyüyən uşaqların ürəyində yurd arzusu vardı. Bu tədbirdə iştirak edən həmin insanlar üçün bayramın adı "müstəqillik", mənası isə "qayıdış" idi. O qayıdış ki, çadırda doğulan körpə bu gün artıq azad və yenidən qurulmuş Laçında dövlət tədbirində iştirak edirdi. Bu tədbir Azərbaycan xalqının təkcə torpağa deyil, kimliyinə, mənəviyyatına, öz haqqına sahib çıxmasının təntənəsidir. Mərasim boyu səslənən musiqilər, bayraqların harmoniyası, rəsmi protokolun ardında gizlənən sevinc dolu baxışlar, xalqla dövlətin eyni meydanda, eyni duyğuda birləşməsi bu günü hisslərlə dərk edilən anlara çevirdi. Burada bayram edən xalqın sevincini yalnız musiqi və alqışlar deyil, gözlərdəki nur, ruhdakı yüngüllük, torpaqda yenidən doğulmuşluq hissi ifadə edirdi. Dövlətin gücü, xalqın dözümü birləşərək bu tədbiri müasir Azərbaycanın siyasi iradəsinin və mənəvi ucalığının simvoluna çevirdi.

Laçın bu gün azad şəkildə nəfəsini alırsa, bu, təkcə hərbi zəfərin yox, həm də ədalətli siyasətin, xalq sevgisinin, mənəvi kökün dərinliyinin təzahürüdür. 28 May 2025-ci il - Laçında yazılan bu səhifə təkcə bir günün xronikası deyil, Azərbaycanın gələcəyinə yazılmış vətənsevərliyin, dövlətçilik iradəsinin və bəşəri dəyərlərin birgə manifestidir.

Şəbnəm UĞURLU

Laçın şəhər 2 nömrəli tam orta məktəbin direktor müavini, Qabaqcıl təhsil işçisi, Laçın şəhər sakini

525-ci qəzet .- 2025.- 30 may(№93).- S.7.