Professor Rafiq Əliyevə məxsus material və şəxsi əşyalar Milli Azərbaycan Tarixi Muzeyinə təqdim olunub

Milli Azərbaycan Tarixi Muzeyində dünya şöhrətli alim, Azərbaycan Milli Elmlər Akademiyasının müxbir üzvü, ABŞ-ın Corciya Universitetinin professoru, Zadə İrsi Süni İntellekt Assosiasiyasının prezidenti professor Rafiq Əliyevə məxsus elmi materialların və şəxsi əşyaların muzeyə təqdim olunması mərasimi keçirilib.

Versus.Az xəbər verir ki, tədbiri giriş sözü ilə Milli Azərbaycan Tarixi Muzeyinin direktoru, akademik Nailə Vəlixanlı açaraq, dahi alim Rafiq Əliyevin elmi irsinin Azərbaycan elminin qızıl səhifələrindən biri olduğunu qeyd edib. Akademik N.Vəlixanlı muzeyə təqdim edilən dəyərli materialların gələcək nəsillər üçün mühüm elmi və mədəni əhəmiyyət daşıdığını qeyd edib. N.Vəlixanlı professor Rafiq Əliyevin ailəsinə və elmi irsinin qorunmasına dəstək göstərən hər kəsə təşəkkürünü bildirib.

Sonra muzeyin baş mühafizi, t.ü.f.d., dosent Məhfuzə Zeynalova, Azərbaycan Dillər Universitetinin rektoru, akademik Kamal Abdulla, xalq şairi Ramiz Rövşən və şair, publisist, tərcüməçi Rəfail Tağızadə, Azərbaycan Mətbuat Şurasının sədri Rəşad Məcid və digər qonaqlar çıxış edərək, Rafiq Əliyevin həm elm, həm də mədəniyyət sahəsində Azərbaycanı beynəlxalq aləmdə layiqincə təmsil etdiyini diqqətə çatdırıblar. Tədbir iştirakçıları professor Rafiq Əliyevin elmi fəaliyyətini, onun dünya elminə və süni intellekt sahəsinə verdiyi böyük töhfələri yüksək qiymətləndiriblər.

Tədbir çərçivəsində alimin həyat və fəaliyyətini əks etdirən videoçarx nümayiş olunub.

Tədbirin bədii hissəsində Əməkdar artist, xanəndə Sevinc Sarıyeva, II Televiziya Muğam müsabiqəsinin qalibi, Asəf Zeynallı adına Musiqi Kollecinin müəllimi Güllü Muradova, kamança ifaçısı Mahir Quliyev, tarzən muğam bilicisi və tədqiqatçı Mehman Mikayılov müxtəlif musiqi nömrələri ifa ediblər.

Sonda professor Rafiq Əliyev çıxış edərək, onun elmi irsinin qorunmasına göstərilən diqqət və dəstəyə görə Milli Azərbaycan Tarixi Muzeyinin direktoru, akademik Nailə Vəlixanlıya və muzeyin kollektivinə dərin minnətdarlığını bildirib.

525-ci qəzet .- 2025.- 18 noyabr (№209).- S.10.