"525-ci..." ucalıq və 33 ilin işığı

Esse

Biz günləri təqvimlə sıralayırıq, təqvimlə ölçürük. Amma tarixin yaddaşında, hər insanın könül evində elə günlər var ki, illər keçdikcə o günün işığı çoxalır, böyüyür, boy atır, sanki zamanın özünə çevrilir. 1992-ci ilin 17 noyabrı həm Azərbaycan mətbuatı, həm də o gündən sonrakı neçə nəsillər üçün məhz o günlərdən biri oldu. Hələ müstəqilliyin nəfəsi təzə-tər olduğu çağlarda, ölkənin taleyi mürəkkəbin sükutuna, sözün mübarizəsinə tapşırıldığı bir vaxtda "525-ci qəzet" "hamının qəzeti" kimi ilk dəfə oxucusunun qarşısına çıxdı. Həmin gün o böyük meydanda insanların əllərində gəzən sadə kağız parçasından, adi qəzet səhifəsindən daha çoxu idi. O, çətinliklər içində öz sözünü qorumağın cəsarəti idi.

O gün bu gündür - üç onillikdən çoxdur ki, bu qəzet ölkənin düşüncə ritmini ölçən bir barometr, ictimai fikrin nəfəsini eşidən bir kürsü, ədəbiyyatın, siyasətin, mədəniyyətin gündəlik salnaməsidir. Onun hər nömrəsi sanki yaddaşımıza yazılmış bir tarix cümləsidir. Bu cümlənin içində müharibə illəri, sülh ümidləri var, azadlıq arzuları, gənc dövlətin formalaşma ehtirası, məhrumiyyətlərin acısı, itirdiklərimizin dərdi, qələbəmizin sevinci, yenidən dirçələn həyatın həyəcanı var.

Bu 33 il ərzində "525" adi qəzetdən daha çoxu olub, bir məktəbə çevrilib. Sözün məktəbi. Qələmin məktəbi. Məsuliyyətin məktəbi. Bəzən qaynar xəbərlərin içində çırpınan bir nəfəs, bəzən ədəbiyyatın sükutuna çəkilmiş bir düşüncə, bəzən də toplumun qəlb ritmini oxucuya çatdıran güzgü olub.

Mənim üçün isə "525" həm də həyatımın fövqəladə təsadüfüdür. 17 noyabrdan başlayaraq, o həftə ərzində həmin meydanda insanlar yenicə çapdan çıxan bir qəzetin səhifələrini vərəqləyərkən heç fərqində də deyildilər ki, cəmi bir neçə kilometr uzaqda bir körpə doğulur. O körpə ki, tale elə o günlərdən onun qədərini bu qəzetlə bağlayıb. O körpə ki, gələcəkdə özündən 4 gün böyük bu qəzetə öncə könlünü, sonra illərini verəcək. Bu qəzet onun arzularının, xəyallarının, etirazlarının, ağrılarının, sevinclərinin ilk şahidinə çevriləcək. Onun danışan dili olacaq. Sanki tale bu dörd günün arasına bir körpü saldı. O körpü ilə bir-birinə bağladı bir qəzeti bir körpənin ömrünə... Qəzet böyüdükcə o körpə də böyüdü. O öz oxucusunu tapdıqca həmin körpə də öz həyat yolunu çizdi. Hər ikimizin doğumunda eyni ilin nəfəsi var. Eyni havanın, eyni çağın işığı.

Aradan illər keçib... Artıq mən 8 ildir ki, bu qəzetin ailəsinin bir üzvüyəm. Bu səkkiz il mənim üçün sadəcə iş deyil, qələmlə nəfəs aldığım illər, sözlə böyüdüyüm, düşüncəylə yetkinləşdiyim yol olub. Hərdən "525-ci qəzet"lə yolumuzun harada, necə kəsişdiyini düşünürəm və hiss edirəm ki, mən qəzetə gəlmədim, qəzet özü yaşıdı olan bir qələmi yanına almaq istədi.

"525-ci qəzet" cəmiyyətin özünüdərk məkanıdır. Burada hər yazı bir ümidin, bir sualın, bir səssizliyin, bir fəryadın səsi kimi doğulur. Bu qəzetin redaksiyası bəzən bir kitabxana səssizliyində olur, bəzən bir meydan ab-havasında. Bəzən bir şairin nəfəsi dolaşır burada, bəzən bir müxbirin yorulmaz addımı.

33 il... Söz üçün az deyil, qəzet üçün isə bütöv bir ömürdür. Bu illər ərzində qəzet yüzlərlə yazar yetişdirib, minlərlə yazıya nəfəs verib, saysız-hesab fikrə inam qatıb. Bəzən bir məqalə cəmiyyətin nəbzini dəyişib, bəzən bir müsahibə gündəmi alt-üst edib. Bəzən bir səhifə yeni bir ədəbi nəslin başlanğıcına çevrilib.

Bugün isə "525" yenə eyni ideallarla yaşayır:

- Sözə sədaqətlə...

- Oxucuya hörmətlə...

- Cəmiyyətə xidmət niyyəti ilə...

- Həqiqəti qorumaq əzmi ilə...

33 yaşına çatmış bir söz tribunası olmaq həm məsuliyyət, həm fədakarlıq, həm də böyük əməklərin bəhrəsidir.

Mən isə taleyimlə həmyaşıd olan bu qəzetin hər yaşında özümü də bir az böyümüş görürəm.

Arzu edirəm ki, "525-ci qəzet" 33 il əvvəl olduğu kimi bundan sonra da ölkənin söz işığını yandırsın. Çap mediası üçün çətin, ağır, tərəddüdlü bir dövrü yaşadığımız bu günlərdə mən yenə də inanıram ki, qələm dostlarının, oxucularının, müəlliflərinin bir araya gəldiyi bu böyük söz ailəsi daim yaşayacaq. Çünki "525-ci qəzet" təkcə kağız səhifələrdə yox, insanların düşüncəsində, yaddaşında, ruhunda, ömür səhifələrində yaşayır.

33 yaşın mübarək, 525!

Sözün yaşını artıran illərin bol olsun!

Şahanə MÜŞFİQ

525-ci qəzet .- 2025.- 18 noyabr (№ 209).- S.9.