Oxuyur Mənsum İbrahimov!

İlin-günün bu vədəsi idi. Payız yayı sıxışdırıb vaxtından bir qədər əvvəl gəlmişdi. Bakı üçün xarakterik olan külək ara vermirdi. İlk dəfə yağışlı-çiskinli bir payız axşamı görüşdük. Bayırda zəhlətökən hava olsa da, içəridə xoş əhval-ruhiyyə hökm sürürdü. Onun bulaq kimi qaynayan ecazkar səsi insanın qəlbini oxşayır, ruhuna sığal çəkirdi.

Mənsum İbrahimov oxuyurdu...

Ertəsi gün yenə qarşılaşdıq. Yenə mahir ifa tərzi, zəngin repertuarı ilə hamını valeh edirdi.

Yaxın qohumumuz olan toy sahibinin kasıb adam olduğunu bilsəm də, jurnalist marağı güc gəldi: "Adil dayı, Mənsum İbrahimov məclisə neçəyə gəlib?"

Kişi qalın qaşlarını çatıb diqqətlə üzümə baxdı: "Nə pul a bala?! Qudam şəhid atasıdır. Onlar çağırıb, kişi də gəlib. Mənsum müəllim şəhid ailələrinin, qazilərin məclisinə təmənnasız gedir".

Bu söhbət təxminən 25 il əvvəl olduğu üçün başqa nədən danışdığımızı xatırlamıram. Xatırladığım odur ki, Mənsum İbrahimov indi saçı-saqqalı ağarmış 50 yaşlı jurnalistin qəlbində hələ 25 il əvvəl taxt qurmuşdu. Həm də təkcə sənəti deyil, sadəliyi, səmimiyyəti ilə...

Xalq artisti, professor Mənsum İbrahimov xüsusi təqdimata ehtiyacı olmayam mahir muğam bilicisi, ustad xanəndə, dəyərli ziyalı, alicənab insandır. Açıq mənbələrdə onun haqqında minlərlə məlumat var. Həmin məlumatlarda qeyd olunur ki, Mənsum İbrahimov 1960-cı il oktyabrın 1-də Ağdam rayonunun İmamqulubəyli kəndində anadan olub. Sənətkarın musiqi dünyasına olan sevgisi uşaq yaşlarından özünü göstərib. Əvvəl Asəf Zeynallı adına Bakı Musiqi Texnikumunda, sonra isə Azərbaycan Dövlət Mədəniyyət və İncəsənət Universitetində təhsil alıb.

Əşşi, Tarixi-Nadir açmağın nə mənası var?! Bizim Mənsum müəllimin təqdimata ehtiyacı yoxdur. Onu təkcə Azərbaycanda sevmirlər. O, bir çox ölkələrdə konsert verib; İranda, Türkiyədə, Fransada, ABŞ-da, yaxın-uzaq diyarlarda Azərbaycan musiqisini tanıdıb, əvəzsiz ifaları ilə insanların qəlbini oxşayıb, ruhunu qidalandarıb.

Mənsum İbrahimov təkcə tamaşaçıların deyil, həm də tələbələrinin sevimlisidir. O, Azərbaycan Milli Konservatoriyasında professor, muğam (xanəndə) kafedrasının müdiridir. Gənclər ondan sənətin incəliklərini öyrənir. İndi o, Azərbaycan mədəniyyətini öz sevimli tələbələri ilə çiyin-çiyinə təbliğ edir. Obrazlı desək, Mənsum müəllimin əkdiyi ağaclar çoxdan bar verib. Bir müəllim üçün bundan böyük xoşbəxtlik nə ola bilər?!

Mənsum İbrahimov həm də fəal ictimai xadim, nümunəvi vətəndaşdır. O, səlis nitqi, mənalı çıxışları sayəsində jurnalistlərin sevimli müsahiblərindən birinə çevrilib. Mənsum müəllim yaxşı oxuduğu kimi, həm də yaxşı danışır.

Yəqin jurnalist dostlarım mənimlə razılaşarlar: Mənsum İbrahimov sənəti ilə zirvədə olsa da, bəzi məşhurlar kimi heç vaxt özünü çəkib dağ başına qoymur. Əksinə, əlçatanlığı ilə seçilir. Hətta mətbuatda ilk addımlarını atan təcrübəsiz jurnalistlərin dolaşıq suallarına da təmkinlə, əhatəli cavab verməyə ərinmir. Buna görə də jurnalistlər onu təkcə ustad xanəndə deyil, həm də təmkinli müsahib kimi sevir və hörmət edirlər. Həm də təkcə jurnalistlər deyil, peşəsindən asılı olmayaraq musiqini sevən, qiymətləndirən hər kəs bu sevginin ünvanıdır...

O, Xalq artisti olmazdan əvvəl xalqın artistidir. Canı, qanı, ruhu ilə bağlı olduğu xalqın...

65 yaşınız mübarək, USTAD!

Allah Sizi pənahında saxlasın!

İnşallah, 100 yaşınızda da aparıcıların dilindən bu sözləri eşidək: Oxuyur Mənsum İbrahimov!

Seymur VERDİZADƏ

525-ci qəzet .- 2025.- 2 oktyabr (№178).- S.10.