Əlizadə Nurinin "Ulduz ətri" adlı yeni kitabı çapdan çıxıb

Bu yaxınlarda şair Əlizadə Nurinin "Ulduz ətri" adlı yeni kitabı çapdan çıxıb. "Adiloğlu" nəşriyyatında işıq üzü görən kitabda şairin son dövr yaradıcılığını əhatə edən şeirləri yer alıb.

Qeyd edək ki, bundan öncə Əlizadə Nurinin "Su notu", "Pəncərəmdə ağlayan yağış", "Tanrı, gəl tanış olaq", "Durna lələyidi bu yağan yağış", "Tənha şamın kölgəsi", "Bir eşqin xatirə muzeyi", "Ulduzların göz yaşı" və "Şeirlə dolu şəhər" adlı şeirlər kitabı çap olunub.

Kitab tanınmış şair və yazıçıların Əlizadə Nurinin yaradıcılığıa haqqında fikirləri ilə açılır. Mərhum Xalq şairi Zəlimxan Yaqubun kitabda yer alan fikirlərində bildirilir: "Hər şairə ürək qızdırıb "mənim şairim" demək olmur. Ancaq mən Əlizadə Nuriyə el-obası, ucqar əyaləti, taleyi, tərcümey-halı, şəxsiyyəti və yaradıcılığı ilə "mənim şairim" deyirəm".

Azərbaycan Yazıçılar Birliyin sədri, Xalq yazıçısı Anar qeyd edir ki, Əlizadə Nuri özünün səmimi obrazlarla zəngin şeirləri ilə müasir şairlər sırasında layiqli yer tutur.

Yarpaq kimi sığalladım xəzəli,

Öz evimdi, öz yaxamdı, öz əlim.

Yaxşı baxsan, qəmin də ən gözəli

Sevgilitək görünəcək dünyada.

...Səni deyib yuxarını gəzirdim,

Ulduzların axarını gəzirdim...

Mən bəxtimin baharını gəzirdim -

Əzilibmiş çiçək-çiçək dünyada.

Əlizadə Nuri özü isə deyir ki, şair ədəbiyyata və əbədiyyətə iddialı olmalı, dünyanı qələminin ucunda hiss etməyi bacarmalıdır: "Şairlikdə birinci şərt istedad olmalı, amma zəhmət də gərəkdir. Necə deyərlər, zəhmət istedadın lampasına neft tökür. Zəhmət deyəndə ilk növbədə mütaliə yada düşür. İstedadı və mütaliəsi olmayanlar üçün şairlik seçim də ola bilir. Bir misra gözəl şeir oxuyub bütün günü həzz içində keçirmək olar. Şeir canişünun tapıntıdır. Aqutakava "heç bir insanın ömrü Bodlerin bir misrasına dəyməz" deyəndə nə qədər haqlı imiş. Sanki Tanrı şairlərə qismət yazanda xəsislik edir. Arzuların boynubükük qalır. Arzularla imkanlar üst-üstə düşmür. Mən heç maddi mahiyyəti qabartmıram ki. Qlobal, mənəvi, psixoloji faktorlar da insan həyatında bir boşluq yaradır. Mən bütövlüyün tərəfindəyəm: bütöv şəxsiyyətin, bütöv mahiyyətin. Amma metamarfozalar, deqradasiyalar baş alıb gedir. Dik dura bilmir adamlar. Bilmirəm, bəlkə də adamlar ona görə yıxılırlar ki, ayaqlarını etibar etmirlər. Ancaq göy üzü çox hündürdür axı. Başı dik saxlayıb yerimək olar. Ömür qısaldıqca adamlar, elə şairlər də sanki bu çatışmazlıqların yerini doldurmaq üçün çox danışan, mahiyyətcə xırdaçı olublar. Söz bir az urvatdan düşüb sanki. Bu arada polyak şairi Letsin bir fikri yadıma düşür. O deyirdi: "Yığcam danış, yoxsa bir də görərsən ki, sözün ağzındaykən zaman dəyişdi". Bax, bu sadaladıqlarım insan ömründə nələrinsə, həm də elə kimlərinsə çatışmamasına gətirib çıxarır. Baxıb görürsən ki, şair demişkən, nəsə çatmır bu Yer üzündə".

Kitabda şairin fərqli mövzuları əhatə edən "Ömür-yanmış zəmi kimi", "Darıxmağın rəsmi", "Sular zərrin deyilsə", "Mən bu qəmin mizanıyam", "Sənə yağış dərirəm", "Hər gün bir həqiqət ölür dünyada", "Dünya özü boyda şirin almadı", "Çətin səndən sonra bu şəhər qala", "Darıxan gecə üçün nəğmə", "Sənə ulduzlardan bir ev qurardım", "Bu dərdin başına tac qoymuşam mən", "Yol", "Mən də sükunətdəyəm", "Bu dünyanı belə görüb gedirəm", "Mənim pəncərəmdə ağlayan yağış", "Kölgədə işıq" kimi maraqlı və oxunaqlı şeirləri yer alıb.

Sən demə, ölüm də əkinçi imiş -

Torpaq ömürləri xışlayıb keçir.

Dünyada nə qədər köçəri qəm var,

Mənim ürəyimdə qışlayıb keçir.

Şeytana daş atan özü də cinmiş,

Sonuncu ümid də dünən keçinmiş.

Göy üzü üstümdən gəlib keçibmiş,

Heyf ki, yanımda düşməyib keçib...

Qeyd edək ki, kitaba şairin rus ədəbiyyatından tərcümələrindən nümunələr də daxil edilib.

SEVİNC

525-ci qəzet .- 2025.- 15 oktyabr (№187).- S.14.