Vətən sevdalısı

Məhəmməd Cavanşir oğlu Babazadə 1995-ci il mayın 5-də Astaranın Marzəsə kəndində dünyaya gəlib. 2001-2012-ci illərdə Siyəkü kənd məktəbində təhsil alıb.

Məhəmmədin gözəl səsi vardı. Lənkəranda musiqi məktəbində oxuyurdu. Müğənni olmaq istəyirdi. Həqiqi hərbi xidmətdən sonra fikrini dəyişdi. "Torpaqlarımız işğaldadır, əlimə mikrafon alıb orda-burda oxuya bilmərəm, bizə hərbiçi lazımdır", - deyərək hərbçi olmağa qərar verib, mikrofonu silaha - tanka dəyişib.

2013-2015-ci illərdə Azərbaycan Silahlı Qüvvələrinin sıralarında Balakəndə müddətli həqiqi hərbi xidmət keçib. Həqiqi hərbi xidmətini başa vurduqdan sonra - 2016-cı ildən Beyləqanda könüllü olaraq müddətdən artıq həqiqi hərbi xidmətə başlayıb. Sonra hərbi kurslarda oxuyaraq tankçı olmağa qərara verib.

Vətən müharibəsinin ilk iştirakçılarından olub Məhəmməd. Füzulinin azadlığı uğrunda gedən döyüşlərdə igidlik göstərib. Sentyabrın 28-də bu döyüşlərdə şəhid olub. Astaranın Marzəsə kəndində dəfn olunub.

Sentyabrın 23-də zəng edib anasıyla danışanda "Bakıda bir aylıq kursdayam" deyib. Sonuncu dəfə sentyabrın 27-də anasına zəng edib: "Bakıda yaşayan xalasıgildə olduğunu, hələ kursun bitmədiyini söyləyib. Ondan əvvəl xalasıyla danışaraq, "yalan"ını gizləməsini xahiş edib".

Oğlunun müharibədə olduğundan bixəbər olan Gülxarə ana qəfildən onun şəhid xəbərini alıb.

Atası Cavanşir 2018-də xərçəng xəstəliyindən dünyasını dəyişib. Ailənin yeganə oğlu, 3 bacının - Arzunun, Pərvinin, Günayın qardaşı idi Məhəmməd.

Bacısı Arzuyla danışıram: "Ürəyinizdən keçənləri deyin" - deyirəm. Başqa söz tapmıram.

"Ürəyim doludur, amma nə deyim, necə deyim, bilmirəm. Həyatımız alt-üst oldu. Ailənin kiçiyi idi. Mən ailənin ilk övladıyam. 9 yaş məndən kiçik idi Məhəmməd. Mənim üçün həmişə uşaq olub o. Heç böyüməyib gözümdə. Demə, çox böyük ürəyi varmış. Demə, böyüyübmüş mənim kiçiyim. Sentyabrın 23-də zəng vurdu. Bakıda kursdayam dedi. Arada gedirdi, inandıq. Demə, müharibə olacağını bilirmiş. Bizi nigaran qoymaq istəməyib. Sentyabrın 27-də danışanda da "Mən kursdayam" dedi. Üç bacı və ananı necə narahat edəydi mərd ürəklim? Vətən birinci idi onun üçün. Musiqini, oxumağı sevirdi, amma şəhidliyi seçdi" - Bunları söyləyir Arzu xanım...

Məhəmməd Babazadə ölümündən sonra "Döyüşdə fərqləndiyinə görə", "Füzulinin azad olunmasına görə", "Vətən uğrunda", "İgidliyinə görə" medalları ilə təltif edilib.

Kamalə ABİYEVA

525-ci qəzet. - 2025.- 1 oktyabr (№177).- S.14.