Şeir

Əjdər Hümmətov Vətən müharibəsi qazisidir. Əslən Laçından olan Ə.Hümmətov 1992-ci ildə dünyaya gəlib. Azərbaycan Texniki Universitetini bitirib. 2019-cu ildən SOCAR-ın Neft Qaz Tikinti Trestində təcrübə keçərək əmək fəaliyyətinə başlayıb, sonra mühəndis vəzifəsində işləyib. Vətən müharibəsi başlayanda könüllü olaraq savaşa qatılan Ə.Hümmətov Cəbrayıl və Qubadlı rayonlarının azad olunması uğrunda gedən döyüşlərdə iştirak edib. Prezident İlham Əliyevin müvafiq sərəncamları ilə "Cəbrayılın azad olunmasına görə" və "Qubadlının azad olunmasına görə" medalları ilə təltif olunub.

Əjdər Hümmətov hələ orta məktəbdə oxuduğu illərdən ədəbi yaradıcılığa da meyl göstərib, şeirlər yazıb, şeirləri qəzet və jurnallarda dərc olunub.

Şeir

Sən mənə şeirtək əzizsən candan,

Səni misra-misra, söz-söz düzürəm.

Misralar sözbəsöz keçir ağlımdan,

Hər sözdə bir uca məna gəzirəm.

Misralar vəhy ilə gəlir, üzümə,

Hər söz ətir saçır, gülür üzümə.

Ürəyim atlanır hər bir sözümə,

Elə ürəyimin özün yazıram.

Bir qayda qoyubdu nizam yaradan,

Seçmək asan olsun ağı qaradan.

Dünyam çiçəklənir sözün barından,

Dünyanın baharın, yazın yazıram.

Ana

Dil açıb ilk sözü ana demişəm,

Hər sözü ilk dəfə ona demişəm.

Olmayıb gözümdə bəşər sevgisi,

Tək onu görmüşəm, onu sevmişəm.

Tək qoymaz, buraxmaz itən izimi,

Yıxılıb əzsəm də hərdən dizimi.

Ona sığınmışam, ona qaçmışam,

Öpübdü alnımdan, silib gözümü.

Uşaq olum qucağına sığınım.

Qurban olum hər saçının telinə,

Səndən ayrı düşsəm, buraxma məni,

Qaldır dəsmal ilə bağla belinə.

Hər dəfə deyirsən, "necədir əynin"?

Qışda soyuq olar, isti geyinin!

Nə qədər böyüyüb, uzaq düşsəm də,

Hələ də balaca körpənəm sənin.

Mən qurban olum

Qəmzəmi vurursan, nazmı edirsən?

Et, sənin nazına mən qurban olum.

Qəlbimi yandırdın, azmı edirsən?

De, xoş avazına mən qurban olum.

Nə qədər xoşbəxtəm, təki biləsən,

Yermi cənnət olub, sənmi mələksən?

Çox lazım deyil ki, bircə sən bəssən,

Qoy, sənin azına mən qurban olum.

Ruhum nəğmə deyib, oxuyur səni,

Həyat çağıracaq bir rəqsə məni.

Vəsf elə yaylağı, çölü-çəməni,

Çal, telli sazına mən qurban olum.

Keçir qəlbimizdən şirin xəyallar,

Sevməyən qəlblər bizdən nə anlar?

İçi qış olanlar, buz bağlayanlar,

Əs, sənin yazına mən qurban olum.

Bir günəşsən, sənin nurun danılmaz,

Ağlın şüphə çəkməz, zənnin yanılmaz.

Huri də sənintək gözəl sayılmaz,

Ömrünün yazına mən qurban olum.

Əjdər HÜMMƏTOV

525-ci qəzet.- 2025.- 8 oktyabr (№182).-S.14.