Milli İncəsənət Muzeyində Əməkdar rəssam Arif Ələsgərovun yaradıcılığına həsr olunmuş fərdi sərgi açılıb

Azərbaycan Milli İncəsənət Muzeyində Əməkdar rəssam, professor Arif Ələsgərovun yaradıcılığına həsr olunmuş “Köhnə bakılı: həsrət və duyğular” adlı fərdi sərgi açılıb.

Muzeydən AZƏRTAC-a bildirilib ki, Mədəniyyət Nazirliyi və Azərbaycan Milli İncəsənət Muzeyinin təşkilatçılığı ilə keçirilən sərgidə rəssamın müxtəlif illərdə yaratdığı 60-dan çox əsər nümayiş olunur. Retrospektiv xarakter daşıyan sərgi Arif Ələsgərovun həm klassikaya çevrilmiş, həm də son illərdə ərsəyə gətirdiyi qrafika və rəngkarlıq əsərlərini əhatə edir.

Sərginin açılışında Azərbaycan Milli İncəsənət Muzeyinin direktoru Şirin Məlikova, Xalq rəssamı Arif Hüseynov, Azərbaycan Rəssamlar İttifaqı sədrinin birinci müavini, Xalq rəssamı, professor Salhab Məmmədov, Azərbaycan Rəssamlıq Akademiyasının prorektoru, Xalq rəssamı, professor Fuad Salayev, ADMİU rektorunun müşaviri, Əməkdar incəsənət xadimi, professor Validə Məmmədova, Azərbaycan Rəssamlıq Akademiyasının “Dizayn” kafedrasının müdiri, dosent Faiq Dadaşov çıxış edərək, sənətkarın çoxşaxəli yaradıcılığının Azərbaycan təsviri sənətinə verdiyi əvəzolunmaz töhfələrdən, onunla olan unudulmaz xatirələrindən, təhsil sahəsində imza atdığı ilklərdən danışıblar.

Sonda çıxış edən Əməkdar rəssam, professor Arif Ələsgərov yaradıcılığı haqqında səslənən fikirlərə və ümumilikdə incəsənətə verilən dəyərə görə təşəkkürünü bildirib.

Daha sonra tədbir iştirakçıları sərgi ilə yaxından tanış olublar.

Sərgidə rəssamın həm qrafika, həm də rəngkarlıq işlərində sadə insanların həyatı, nəsillərarası münasibətlər, sevgi, varlığın mənası və başlanğıcı kimi mövzular əksini tapıb. Onun çoxsaylı tablolarında xüsusi yer tutan İçərişəhər rəssamın ruhuna hopmuş Bakı nostaljisini və keçmişlə bu gün arasında qurduğu poetik körpünü əks etdirir.

Qeyd edək ki, “Köhnə bakılı: həsrət və duyğular” sərgisi oktyabrın 26-dək ziyarətçilər üçün açıq olacaq.

525-ci qəzet. - 2025.- 11 oktyabr (№ 185). - S.18.