Gənclər Kitabxanasında Cəfər Cabbarlının “Sevil” və “Almaz” əsərlərinin müzakirəsi təşkil edilib

Cəfər Cabbarlı adına Respublika Gənclər Kitabxanasında kitabxana, “Xan” nəşriyyatı və “Azərbaycan oxucuları” Kitab klubunun birgə təşkilatçılığı ilə görkəmli dramaturq Cəfər Cabbarlının “Sevil” və “Almaz” əsərlərinin müzakirəsi təşkil edilib.

Kitabxanadan AZƏRTAC-a bildirilib ki, tədbirin fəxri qonağı Cəfər Cabbarlının ev-muzeyinin rəhbəri, Əməkdar mədəniyyət işçisi, Cəfər Cabbarlının nəvəsi Qəmər Seyfəddinqızı olub.

Cəfər Cabbarlı yaradıcılığının gənclər arasında təbliği, əsərlərinin müzakirəsi məqsədilə təşkil edilən tədbirdə “Azərbaycan oxucuları” Kitab klubunun üzvləri, müxtəlif ali təhsil ocaqlarının tələbələri iştirak ediblər.

Kitabxananın Elmi işlər üzrə direktor müavini Günay Həsənova 1937-ci ildən Cəfər Cabbarlının adını daşıyan Respublika Gənclər Kitabxanasında Azərbaycan mədəniyyətinin, ədəbiyyatının görkəmli nümayəndələrinə həsr edilən tədbirlərin keçirilməsi zəruriyyətini vurğulayıb.

Cəfər Cabbarlının ev-muzeyinin rəhbəri Qəmər Seyfəddinqızı ədibin həyat və yaradıcılığı haqqında məlumat verərək, onun milli azadlıq və istiqlal ideallarının tərənnümçüsü olmasını, qadın azadlığı mövzusuna daim həssas münasibət bəslədiyini bildirib. Ailəsinin xatirələrini dilə gətirərək, Cəfər Cabbarlının yaradıcılığı, ədəbi və ictimai fəaliyyəti ilə bağlı maraqlı epizodları bölüşüb.

“Azərbaycan oxucuları” Kitab klubunun nümayəndəsi Əfsanə Ağayeva Cəfər Cabbarlının o dövrdə qələmə aldığı, müraciət etdiyi mövzuların, ön plana çəkdiyi problemlərin bu gün də aktual olduğunu və bununla da görkəmli ədibin zəngin irsinin bir klassika, gənclər üçün bir örnək olduğunu qeyd edib.

“Xan” nəşriyyatının nümayəndəsi Aysel Səfərova son illərdə nəşriyyat tərəfindən çap olunan Sona xanım Cabbarlının xatirələri əsasında toplanan “Xatirə ədəbiyyatı” silsiləsindən “Onu kim unudar?” kitabı, “Sevil” və “Almaz” nəşrləri haqqında məlumat verərək, “Milli klassika” seriyasından çap edilən nüsxələri Qəmər Seyfəddinqızıya hədiyyə edib.

Ədibin həyat və yaradıcılığı ilə bağlı məlumatları diqqətə çatdıran Qəmər Seyfəddinqızı müzakirə olunan əsərlərlə bağlı düşüncələrini, təhlili fikirlərini gənclərin diqqətinə çatdırıb. Tədbirdə Cəfər Cabbarlının ustalıqla yazılan və bir sıra məsələlərdə hələ də aktuallığını itirməyən əsərləri, onların mövzuları və personajları geniş müzakirə olunub.

Müzakirələrdə yaxından iştirak edən gənclərin Cəfər Cabbarlı yaradıcılığı ilə bağlı fikirləri dinlənilib və onları maraqlandıran suallar cavablandırılıb.

Kitabın müzakirəsində kitabxana tərəfindən hazırlanan “Sənəti ilə həyata yol göstərən Cəfər Cabbarlı” adlı videomaterial nümayiş olunub.

Sonda Qəmər Seyfəddinqızı Cəfər Cabbarlının xatirəsinə həsr edilən tədbirin təşkilinə görə kitabxanaya dərin təşəkkürünü bildirib.

525-ci qəzet .- 2025.- 22 oktyabr (№ 192).- S.12.