Londonda Humay Quliyevanın xatirəsinə həsr olunmuş xeyriyyə konserti keçirilib

Əslən Azərbaycandan olan, hazırda Londonda fəaliyyət göstərən beynəlxalq səviyyədə tanınmış iki musiqiçi - Dr. Səbinə Rakçayeva (skripka) və Dr. Günel Mirzəyeva (piano) - İngiltərə paytaxtında yaddaqalan konsert proqramı təqdim ediblər. "Şərqdən Qərbə" adlı konsert musiqinin və xatirələrin dili ilə Beynəlxalq Qırmızı Xaç Komitəsinin keçmiş əməkdaşı Humay Quliyevanın qısa, lakin parlaq ömrünə, onun xeyirxahlıq və humanizm dolu xatirəsinə həsr olunub.

Humay Quliyevanın Londondakı dostlarının təşkilatçılığı ilə baş tutan konsert "World Heart Beat", "Embassy Gardens" (3 Ponton Road, Nine Elms, London, SW11 7BD) ünvanında keçirilib. Tədbir Azərbaycan və beynəlxalq icma üzvlərini bir araya gətirərək, Humayın mərhəməti, zəkası və daim yaşayan xatirəsi ilə bağlı dərin duyğularla dolu təsirli, unudulmaz bir axşam yaşadıb. Tanınmış bəstəkarların əsərləri səsləndirilib, video təqdimatlar nümayiş olunub, Humayın maraqlı həyat yolu, həyatı, təhsilə sadiqliyi və humanitar dəyərlərə bağlılığını əks etdirən çıxışlar dinlənilib.

Konsertin konsepsiyası, bədii rəhbərliyi və açılış çıxışı Humayı yaxından tanıyan görkəmli skripka ustası Dr. Səbinə Rakçayevaya məxsusdur. Musiqi axşamı boyunca onun baxışı Şərq və Qərb musiqi ənənələrini birləşdirərək səmimi və dərin mənalı bir musiqi körpüsü yaradıb.

Humayın xatirəsini yaşatmaq və işini davam etdirmək məqsədi ilə təsis edilən Huma Quşu Təhsilə Yardım Fondunun prezidenti, Humayın anası, Şahlə Vəzirova öz çıxışında musiqiçilərə və təşkilatçılara, eyni zamanda iştirakları ilə fondun fəaliyyətinin genişlənməsinə töhfə verən bütün donor və dəstəkçilərə səmimi minnətdarlığını bildirib.

Azərbaycanda və xarici ölkələrdə istedadlı gənclərin təhsilinə dəstək verən Huma Gushu Təhsilə Yardım Fondu 2022-ci ildə Humayın ailəsi tərəfindən təsis edilib. Fond az gəlirli ailələrdən olan istedadlı tələbələrə bakalavr, magistr və doktorantura təhsili üçün təqaüd və qrantlar ayırır, mentorluq və inkişaf proqramları ilə onların məqsədlərinə çatmasına yardım edir. Qarabağ müharibəsi veteranlarına informasiya texnologiyaları və digər bazar yönümlü ixtisaslar üzrə təlimlərin təşkili də Fondun fəaliyyətinin prioritet istiqamətlərindən birini təşkil edir.

Fondun fəaliyyəti tam şəkildə könüllülər tərəfindən həyata keçirilir və onlar Humayın fədakarlıq, təhsil və sosial təsir irsini yaşatmaqda davam edirlər.

Fondun təşəbbüsləri Humayın Beynəlxalq Qırmızı Xaç Komitəsində yeddi illik fəaliyyəti dövründə qazandığı şəxsi vəsaitləri, eləcə də onun xeyirxah missiyasını dəstəkləyən donorların ianələri hesabına maliyyələşdirilir.

Konsertdən əldə olunan bütün gəlir Huma Gushu Təhsilə Yardım Fondunun hesabına keçirilib və beləliklə də, yeni istedadlı gənclərə maddi dəstək imkanlarını daha da artırıb.

"525"

525-ci qəzet .- 2025.- 22 oktyabr (№ 192).- S.10.