“Klassika musiqisinin zamanı” təqdim olunub

Oktyabrın 28-də Üzeyir Hacıbəyli adına Bakı Musiqi Akademiyasında (BMA) görkəmli Azərbaycan bəstəkarları Üzeyir Hacıbəyli və Müslüm Maqomayevin anadan olmasının 140 illiyinə həsr olunmuş “Klassika musiqisinin zamanı” layihəsinin təntənəli təqdimatı və bəstəkarlarının yubileylərinə həsr olunmuş bayram konserti keçirilib.

AZƏRTAC xəbər verir ki, əvvəlcə Azərbaycan Dövlət Himni səsləndirilib.

Müasir Azərbaycan gəncləri arasında milli və beynəlxalq akademik musiqinin təbliğinə yönəlmiş “Klassika musiqisinin zamanı” layihəsi görkəmli Azərbaycan bəstəkarları Üzeyir Hacıbəyli və Müslüm Maqomayevin gələcək nəsillərə miras qoyduqları zəngin musiqi irsinin qorunmasına və geniş təbliğinə xidmət edir.

Konsert proqramında Beynəlxalq müsabiqələr laureatları, BMA-nın müəllimləri və tələbələri iştirak ediblər.

Layihənin bədii rəhbəri, sənətşünaslıq üzrə fəlsəfə doktoru, Bakı Musiqi Akademiyasının baş müəllimi Alyona İnyakinadır.

525-ci qəzet 2025.- 30 oktyabr (№198).- S.9.