Gözlərinlə dedin: “Sevirəm səni”

Gözlərinlə dedin: “Sevirəm səni”.

Sanki ruha hopub indi qəm, kədər.

Büllur zəngin səsi tərpədir məni,

Deyilməmiş qaldı deyilməyənlər.

Həyat ötüb keçdi, perronsa qalıb,

Vağzalın ruporu səslənir hədər.

Çoxları çox sözü qələmə alıb,

Deyilməmiş qaldı deyilməyənlər.

Gecələr parlaqdır, gündüz qaranlıq,

Tale tərəzini düzəldər, əyər.

Sözlər Günəş kimi yanar bir anlıq,

Deyilməmiş qaldı deyilməyənlər.

Çox dəhşətli olur sözlər susanda

Çox dəhşətli olur sözlər susanda,

Hardasa, kimdənsə gizlənən zaman

sözlər gözdən düşür sanki bir anda,

sözünün sahibi olmayır insan.

Kimsə o sözlərçün kədərlənirdi,

onların axırı əvvəldi bilsən.

Milyardlarla söz var, demək çətindir,

İlk dəfə onları sən deməlisən.

Hər şey təkrarlanır: həm şər, həm xeyir,

Hər şey təkrarlanır: həm nəğmə, həm sim.

Amma poeziya təkrarlanmayır

O, qəlbin telinə toxunar daim.

Lina KOSTENKO

Tərcümə edən: Firuz Mustafa

525-ci qəzet. - 2025.- 12 sentyabr (№164).- S.15.