Paşa Qəlbinur Aytmatov Akademiyasının Fəxri akademiki seçilib

Görkəmli oftalmoloq-cərrah, professor, Azərbaycan Tibb Universitetinin oftalmologiya kafedrasının müdiri Paşa Qəlbinur "Tibdə və ədəbi yaradıcılıqdakı uğurlarına görə" Aytmatov Akademiyasının Fəxri akademiki seçilib. Professora Akademiyanın diplomu və nişanını Azərbaycan Yazıçılar Birliyində Akademiyanın Prezidenti Azizbek Akmataliyev tərəfindən təqdim edilib.

Aytmatov İctimai Akademiyası 1994-cü ildə böyük qırğız yazıçısı Çingiz Aytmatovun türk ədəbiyyatı irsinin saxlanılması və genişləndirilməsi məqsədilə yaradılıb. Görkəmli yazıçılar, dramaturqlar, şairlər, filosoflar, tarixçilər, aktyorlar, rejissorlar, dilçilər, professorlar və elmlər doktorları Akademiyanın fəxri və həqiqi üzvləri seçilirlər.

Azərbaycan oftalmologiyasının görkəmli nümayəndələrindən biri olan Paşa Qəlbinur TCOD, Türk Cümhuriyyətləri Oftalmoloji Dərnəyinin həqiqi üzvüdür. Həmçinin Amerika Oftalmologiya Akademiyasının həqiqi üzvü, Rusiya Tibb Elmləri Akademiyasının fəxri doktorudur. Dünya Türk Cümhuriyyətləri Oftalmoloji Birliyinin idarə heyətinin üzvü, Azərbaycan üzrə Nobel İnformasiya Mərkəzinin nəzdində fıziologiya bölməsinin ekspertidir. 2021-ci ildən isə Dünya Türk Cümhuriyyətləri Oftalmoloji Birliyi Bilimsəl qurumunun həmsədri seçilib. Paşa Qəlbinur 2001-ci ildə ABŞ-nin Biblioqrafiya İnstitutunda keçirilən "2000 alim və intellektual" seçimində "İlin adamı" mükafatına və Yusif Məmmədəliyev adına mükafata, "İman" izzət və iltifat diplomuna layiq görülüb.

Paşa Qəlbinur tibb elmləri sahəsində 100-dən çox elmi əsər və 10 elmi kəşf müəllifidir. On mindən çox uğurlu oftalmoloji cərrahiyyə əməliyyatı həyata keçirib.

Paşa Qəlbinur üçün gözlər - sadəcə biologiyanın bir orqanı deyil, ruhun pəncərəsi, hisslərin aynası, fəlsəfi düşüncənin mərkəzidir. Onun ilk şeiri "Gözlər" adlanır və o, bu şeiri 13 yaşında qələmə alıb.Ədəbi təxəllüsü "Qəlbinur" - yəni "qəlbin nuru" onun şəxsiyyətini əks etdirir. Poeziyasının mövzusu əsasən insan, gözəllik, duyğular və həyat fəlsəfəsidir. Bəzi əsərləri müxtəlif dillərə tərcümə olunub, antologiyalara daxil edilib. Ədəbiyyatda onun poetik baxış bucağı insanın iç aləminə, ruhun gözlərdən oxunmasına yönəlib. Həkimliyi ilə poeziyasını belə izah edir: "Göz həkimliyi romantik sənətdir. Sən gözə toxunursan - gözün içindən keçərək insanın qəlbinə yol tapırsan".Professor deyir ki, tibb aləmində və ədəbi sahədəki yaradıcılıqdaki uğurlarına görə o, Aytmatov Akademiyasının fəxri Akademiki adına layiq görülüb: "Akademiyanın elmi şurasının qərarı ilə mən Tibdə və Ədəbi yaradıcılıqdakı uğurlarına görə Aytmatov Akademiyasının fəxri Akademiki seçilmişəm. Bu, mənim əməyimə, zəhmətimə verilən qiymətdir".Paşa Qəlbinur oftalmologiyanı "romantik sənət" adlandırır. Onun fikrincə, həkim öz peşəsini bütün varlığı ilə sevməlidir və xəstəyə bütöv diqqət yetirməlidir. Paşa Qəlbinur - Azərbaycan tibb elminin və ədəbiyyatının nadir bir simasıdır. O, həm göz həkimi, həm pedaqoq, həm də şairdir. Onun fəaliyyəti təkcə oftalmoloji yeniliklərlə deyil, insanın ruhuna və gözlərinə olan dərin hörməti ilə də yadda qalır.İnsanın görməsi üçün sadəcə göz lazım deyil. Bəzən görmək üçün qəlbin nuru da lazımdır. Paşa Qəlbinur, bu nurun sahibi və bəxş edəndir.

Sevinc QARAYEVA

525-ci qəzet. - 2025.- 27 sentyabr (№175).- S. 18.