Parisdə Xurşidbanu Natəvanın yaradıcılığına həsr olunmuş məclis

Parisdə, Azərbaycan səfirliyinin nəzdindəki Mədəniyyət Mərkəzində görkəmli Azərbaycan şairəsi Xurşidbanu Natəvanın yaradıcılığına həsr olunmuş ədəbi-musiqili məclis keçirilib.

AZƏRTAC xəbər verir ki, ədəbi məclisdə fransız ədəbiyyatının və intellektual dairələrinin nümayəndələri, şair və yazıçılar, habelə jurnalistlər iştirak ediblər.

Ölkəmizin Fransadakı səfiri Leyla Abdullayeva tədbirdə çıxış edərək XIX əsr tanınmış Azərbaycan şairəsi, sonuncu Qarabağ xanının qızı Xurşidbanu Natəvan haqqında danışıb, dövrünün aparıcı qadın siması olan xan qızının zəngin yaradıcılığı, Azərbaycan ədəbiyyatının və incəsənətinin inkişafına verdiyi töhfəsi, habelə onun xeyriyyəçilik fəaliyyəti barədə iştirakçılara məlumat verib. Məclisdə fransız nümayəndələr, Marsel Dram İncəsənət Konservatoriyasının məzunu və klassik vokal sahəsində təhsil almış Alən Tremolye, “Rives Méditerranéenes” mədəniyyət təşkilatının prezidenti, altı şeirlər toplusunun müəllifi şair Fatima Chbiban, habelə ədəbiyyat nəzəriyyəsi üzrə təhsil almış və hazırda Strasburq Universitetinin Yaxın Şərq və Aralıq dənizi ətrafı ölkələri üzrə regionşünaslıq fakültəsinin tələbəsi, ədəbi əsərlərin tərcüməçisi Sitarə Quliyeva Natəvanın bədii yaradıcılığından bəhs edib, Azərbaycan və fransız dillərində onun qəzəllərini səsləndiriblər.

Qəzəllərin təqdimatı Azərbaycan milli musiqisi və muğamı ilə müşayiət edilib. Tar və kamançada Azərbaycan Milli Konservatoriyasının İnstrumental ifaçılıq kafedrasının baş müəllimi, tarzən Elçin Nağıyev və Qarabağ Universitetinin İncəsənət fakültəsinin dosenti, Xalq artisti və kamança ustası Elşən Mansurov ifa ediblər.

Muğamın ahəngi ilə qəzəllərin poetik dərinliyinin vəhdəti milli mədəniyyətimizin zənginliyini nümayiş etdirməklə yanaşı, dinləyicilərin könlünü oxşayıb.

Natəvan poeziya məclisinin iştirakçıları tədbirin sonunda Mədəniyyət Mərkəzinin bağında görkəmli şairənin heykəli önündə xatirə şəkli çəkdiriblər.

525-ci qəzet.-2025.- 30 sentyabr (№176).- S.10.