Teatrlarımızın 2026-cı il planında nələr var...

2026-cı ilin ilk ongünlüyünün tamamında sənətsevər oxucularımızı Azərbaycan teatrlarının bu il üçün planları ilə tanış etməkdən ötrü üzümüzü ölkənin səhnə kollektivlərinə çevirdik.

Azərbaycan Dövlət Akademik Milli Dram Teatrının mətbuat katibi Cavid Zeynallı dedi ki, yanvarın sonlarında Şota Rustaveli adına Gürcüstan Milli Teatrının baş rejissoru, tanınmış rejissor və bəstəkar David Sakvarelidzenin quruluşunda V.Şekspirin "Kral Lir" faciəsi əsasında eyniadlı tamaşanın məşqləri başlanacaq: "Tamaşa Xalq artisti Nurəddin Mehdixanlının 70 illik yubileyinə benefis olaraq hazırlanacaq. Səhnə əsərində teatrın bir çox tanınmış simaları iştirak edəcəklər. Tamaşanın premyerası aprel ayına nəzərdə tutulub".

Sumqayıt Dövlət Dram Teatrının baş rejissoru Firudin Məhərrəmovun quruluşunda Cəfər Cabbarlının "Aydın" əsərinin premyerası fevralın sonu-martın əvvəllərinə planlaşdırılır: "Teatrımızın memorandum imzaladığı türkdilli dövlətlərin milli teatrlarının rəhbərlərinin iştirakı ilə martın 10-da Milli Teatr Günü qeyd ediləcək və milli kimlik, milli özünüdərk mövzusunda yeni tamaşa təqdim olunacaq. Bu tamaşa ilə bağlı yaxın günlərdə ictimaiyyətə məlumat veriləcək".

Digər memorandum əsasında Çinin məşhur dramaturqu Lyu Şuqanın "Ölünün diriləri ziyarət etməsi" əsəri əsasında hazırlanmış tamaşanın məşqləri yaxın aylarda başlayacaq. Bu tamaşanın da 2026-cı ilin ilk yarısında təhvil verilməsi planlaşdırılır.

Azərbaycan Dövlət Milli Gənc Tamaşaçılar Teatrında 2026-cı ilin ilk premyerası "Neft bumu hamıya gülümsəyir" ilə gerçəkləşəcək. Teatrın mətbuat katibi Samirə Əşrəf bildirdi ki, səhnə əsəri Xalq yazıçısı Maqsud İbrahimbəyovun 90 iliyi münasibətilə Prezident İlham Əliyevin imzaladığı Sərəncam əsasında hazırlanıb.

İkinci premyera Xalq artisti Cənnət Səlimovanın quruluşunda hazırlanan "Hacı Qara", növbəti tamaşa isə Qoqolun "Evlənmə" əsəri əsasında Elşad Rəhimzadənin quruluş verdiyi "Evlənmə" olacaq. Teatrın repertuarında, hər zaman olduğu kimi, bu il də uşaq tamaşalarına geniş yer veriləcək. Məşhur milyonçu Murtuza Muxtarovun həyatından bəhs edən əsərin sifarişi verilib. Yaxın gələcəkdə tamaşaçılarımız bu əsəri də teatrımızın səhnəsində görə biləcəklər".

Sumqayıt Dövlət Dram Teatrının mətbuat katibi Turan Etibaroğlu bildirdi ki, yeni ilin ilk premyerasına hazırlıq gedir: "Yanvarın 23-də dünya dramaturgiyasının görkəmli nümayəndəsi Molyerin "Jorj Danden, yaxud Aldanmış ər" əsəri əsasında səhnələşdirilən "Aldanmış ər" komediyası təqdim olunacaq. Mirzəağa Atəşin "Şərəfin sandığı" pyesi əsasında "Gəlinlərin savaşı" adlı yeni komediya tamaşasının məşqləri davam edir".

Teatr növbəti ay qardaş Türkiyədə keçiriləcək I Beynəlxalq Solo Fest Mono Tamaşalar Festivalında Ülviyyə Heydərovanın müəllifi olduğu "Pələng" mono tamaşası ilə ölkəmizi təmsil edəcək.

Bakı Uşaq və Gənclər Teatrının ədəbi-dram hissə müdiri Leyla Həşimovanın sözlərinə görə, bu teatr yanvar ayına iki tamaşanın premyerasını nəzərdə tutub. Onlardan biri "Dovşanın evi"dir (müəllif Arzu Soltan, quruluşçu rejissor İntiqam Soltan). Aygün Həsənoğlunun müəllifi olduğu "Zaman maşını" adlı əsərə isə Mehman Piriyev və Rauf Hüseynli quruluş verib.

Teatrda bu mövsüm "Atan ruslardır" (müəllif və rejissor İntiqam Soltan), "Axirətdən gələn zəng" (müəllif Hüseynbala Mirələmov, rejissor Ağalar İdrisoğlu), "Pişiklər və şirlər" (müəllif və rejissor İlhamə Əhmədova), narkomaniyaya qarşı mübarizəyə həsr olunmuş "Həyatla oyun" (müəllif Arzu Soltan, rejissor İntiqam Soltan) tamaşaları da hazırlanır.

Abdulla Şaiq adına Azərbaycan Dövlət Kukla Teatrının mətbuat katibi Həmidə Rüstəmovanın açıqlamasından öyrəndik ki, 2025-ci il Kukla Teatrı üçün məhsuldar, yaddaqalan, repertuar və festival proqramına görə çox zəngin bir il olub: "2026-cı ilə də böyük yaradıcılıq planları ilə başlamışıq. Bu da təsadüfi deyil. Çünki teatrımız özünün yubileyini - 95 illiyini qeyd edəcək. Bu mənada rəngarəng tədbir və tamaşa planımız var. İl ərzində Solmaz Amanovanın "Turac və sehrli daraq" (rejissor Səidə Haqverdiyeva), Dmitri Boqoslovskinin "Səyyah" (rejissor Anar Məmmədov), Abdulla Şaiqin "Danışan gəlincik" (rejissor Müşfiq Əliyev), Şarl Perronun "Yatmış gözəl" (rejissor Anar Məmmədov) tamaşaları hazır olacaq. Dəvətli rejissorların quruluşunda daha 3 tamaşa da nəzərdə tutulub. Qastrol və festivallar baxımından da 2026-nın teatrımız üçün yaddaqalan və məhsuldar bir il olacağına inanırıq".

Şahanə MÜŞFİQ

525-ci qəzet .- 2026.- 9 yanvar (№1).- S.12.