Anarın "Gəl qoşulaq durnalara" kitabı təqdim olunub

Azərbaycan Yazıçılar Birliyinin (AYB) sədri, Xalq yazıçısı Anarın AYB Bədii Tərcümə və Ədəbi Əlaqələr Mərkəzinin xətti ilə işıq üzü görən "Gəl qoşulaq durnalara" şeirlər kitabının təqdimat mərasimi keçirilib.

Azərbaycanda Atatürk Mərkəzinin direktoru, akademik Nizami Cəfərov tədbirdəki giriş sözündə Anar yaradıcılığından, onun Azərbaycan və ümumtürk ədəbiyyatındakı yerindən danışıb.

Tədbirin moderatoru olan AYB Bədii Tərcümə və Ədəbi Əlaqələr Mərkəzinin sədri Əsəd Cahangir çıxış edərək kitabın ərsəyə gəlməsindən danışıb. Qeyd edib ki, "Zərdabi nəşr" MMC-də işıq üzü görən kitab Azərbaycan və rus dillərində nəşr edilib. Kitabda müəllifin müxtəlif illərdə yazdığı şeirləri və "Anara 40 sual" ("40 voprosov Anaru") silsilə müsahibəsi toplanıb. Həmçinin, Ə.Cahangir kitabda zəhməti olan hər kəsə, Bədii Tərcümə və Ədəbi Əlaqələr Mərkəzinin əməkdaşlarına, eləcə də kitabın çapında göstərdiyi dəstəyə görə "Zərdabi" nəşriyyatının direktoru Elman Qasımova təşəkkürünü bildirib.

Azərbaycan Milli Elmlər Akademiyasının (AMEA) prezidenti, akademik İsa Həbibbəyli çıxışında Anar yaradıcılığından, onun poeziyasındakı özəlliklərdən danışıb, kitab haqqında öz fikirlərini bölüşüb.

Həmçinin, tədbirdə Xalq yazıçıları Çingiz Abdullayev, Elmira Axundova, AYB-nin sədr müavini, Mətbuat Şurasının sədri Rəşad Məcid, AYB-nin katibləri Elçin Hüseynbəyli və Səlim Babullaoğlu, AMEA Folklor İnstitutunun direktoru Muxtar İmanov, professor Qəzənfər Paşayev, Milli Məclisin deputatı Səyyad Aran, "Ədəbiyyat qəzeti"nin baş redaktoru Azər Turan, yazıçı-publisist Rüstəm Dastanoğlu, professor Salidə Şərifova, tərcüməçi Alina Talıbova çıxış edərək kitabın məziyyətlərindən danışıblar.

Bildirilib ki, həyatın və dünyanın faniliyi, ömrün mənası, zamanın keçiciliyi, Vətən həsrəti, qürbət nisgili kimi fəlsəfi mövzulara həsr olunmuş, müəllifin qələm dostları və yaxınlarına, bir sıra görkəmli ədəbiyyat adamlarına ithaf edilmiş, ənənəvi və modern üslubda yazılmış bu şeirlər ədəbiyyatımızın bir sıra problemləri, xüsusən də, 60-cılar ədəbi nəslinin yaradıcılığı üzərində gəzişmələrdən ibarət olan müsahibə rus dilində ilk dəfədir ki, işıq üzü görür.

Qeyd edilib ki, nəşrin ideya müəllifi Azərbaycan Yazıçılar Birliyi Bədii Tərcümə və Ədəbi Əlaqələr Mərkəzinin sədri Əsəd Cahangir, redaktoru Dürdanə Hüseynova, rus dilinə tərcüməçiləri Alina Talıbova, Leyla Əliyeva, Fikrət Kazımov və Nərminə Nəbiyevadır.

Sonda çıxış edən Xalq yazıçısı Anar göstərilən diqqətə görə tədbir iştirakçılarına və çıxışçılara, kitabın ərsəyə gəlməsində zəhməti olan hər kəsə minnətdarlığını bildirib.

Şahanə MÜŞFİQ

525-ci qəzet.-2026.- 16 yanvar (№2).-S.12.