Rövşən Məmmədov: Dil normalarının pozulma səbəbləri barədə geniş müzakirələr aparılmalıdır

Azərbaycan dilinin saflığının qorunması məsələsinə praktiki prizmadan yanaşmalı, dilimizin pozulma məqamları üzərində ciddi şəkildə düşünməliyik. Biz çox vaxt nəticə ilə mübarizə aparırıq, lakin həmin nəticəyə aparan səbəblər və yollar kifayət qədər müzakirə olunmur. Əslində isə Azərbaycan dilinin normalarının pozulma səbəbləri ətrafında geniş və məqsədyönlü müzakirələr aparılmalıdır.

AZƏRTAC xəbər verir ki, bu sözləri “Audiovizual mediada Azərbaycan dilinin saflığının qorunması yeni çağırışlar müstəvisində” mövzulu elmi-praktik konfransda “Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov deyib.

O qeyd edib ki, media cəmiyyətin güzgüsüdür. Cəmiyyətdə baş verən bütün müsbət və mənfi hallar, o cümlədən dil mədəniyyətinin səviyyəsi ilk növbədə mediada əks olunur. Bu baxımdan media nümayəndələrinin üzərinə böyük məsuliyyət düşür. Dil normalarına riayət olunması, ədəbi dilin qorunması və düzgün təqdim edilməsi cəmiyyətə birbaşa təsir göstərir.

R.Məmmədov bu sahədə atılmalı olan ilkin və ən vacib addımlardan danışıb. Onun sözlərinə görə, hansı dildə təhsil almasından asılı olmayaraq, uşaqlar Azərbaycan dilini səlis və düzgün şəkildə öyrənməlidirlər. “Ulu Öndər Heydər Əliyevin ana dilində səlis, aydın və nümunəvi çıxışları gənclər üçün əsl örnək olmalıdır. Onun dilə olan hörməti və diqqəti bu gün də hər bir Azərbaycan vətəndaşı üçün yol göstərən bir nümunədir. Bu mühüm vəzifənin effektiv icrası isə ilk növbədə orta məktəblərdən başlamalıdır”, - deyə R.Məmmədov vurğulayıb.

525-ci qəzet .- 2026.- 16 yanvar (№2).- S.4.