“Qarabağ” pley-offda!

SON TURDA MƏĞLUB OLSA BELƏ...

Futbolun bəzəyi qoldur. İllah da o qol son saniyələrdə vurula və komandaya qələbə gətirə. Təkcə qələbə? “Qarabağ” dünən gecə daha bir tarixi zəfərə imza atdı. Komandamız oyunun gedişində həm də isveçrəli hakim Sandro Şörerin “köməyilə” hesabda geri düşsə də, yekunda oyunun əsas vaxtına əlavə edilmiş 4-cü dəqiqədə Bəhlul Mustafazadənin qolu ilə “Ayntraxt” üzərində 3:2 hesablı qələbə qazandı. Oyun haqqında uzun-uzadı yazmağı lazım bilmirəm. “Qarabağ” necə qalib gəldi, oyunda və oyun sonrası nələr baş verdi?.. Tarixdə nəticə qalır. Amma bu oyun da uzun müddət yaddaşlardan silinməyəcək.

Dünənki qələbə həm də bir ilk oldu. Artıq əminliklə demək olar ki, “Qarabağ” Çempionlar Liqasının qrup mərhələsində minimum vəzifənin öhdəsindən gəlib və pley-offa yüksəlib. Düzdür, bu, riyazi olaraq hələ təsdiqlənməyib. Amma son turda keçiriləcək oyunları analiz etməklə pley-offa indidən hazırlaşmaq olar. Hətta komandamız səfərdə “Liverpul”a, özü də böyük hesabla məğlub olsa belə.

Turnir cədvəlinə nəzər saldıqda “Qarabağ” 10 xalla 18-ci pillədə qərarlaşıb. Reqlamentə əsasən 36 komandalı Liqa mərhələsində ilk 8 komanda birbaşa 1/8 finala yüksəlir. 9-24-cü yerlərin sahibləri isə pley-offa vəsiqə qazanır ki, buradan da qalib 8 komanda mübarizəni 1/8 final mərhələsində davam etdirəcək. 25-36-cı yerdə qərarlaşanlar isə mövsümü başa vurmalı olacaqlar.

Şər deməsən, xeyir gəlməz. Hesab edək ki, “Qarabağ” son oyununda “Enfild Roud”da “Liverpul”a məğlub oldu. Bu halda komandamızın pley-offdan kənarda qalması üçün ondan aşağıda qərarlaşan və son turda xal ehtiyatını azı 10-a çatdırmaq ehtimalı olan bütün rəqiblərin qalib gəlməsi mütləqdir. Turnir cədvəlinə fikir versək, bu rəqiblər arasında ən az xalı olan 27-ci pillədəki “Brügge”dir - 7 xal. “Marsel”, “Bayer” və “Monako”nun 9, PSV, “Atletik”, “Olimpiakos”, “Napoli” və “Kopenhagen”in isə 8 xalı var. 28-ci yerdən aşağıdakı komandaların qələbəsinin əslində, “Qarabağ”a xeyiri dəyəcək. Bu komandalar qalib gələcəkləri təqdirdə belə xal ehtiyatı baxımından komandamıza çata bilmirlər. Üstəlik, qələbə sayəsində “Qarabağ”ı keçmək ehtimalı olan bəzi komandaları büdrədəcəklər.

Gələk əsas məsələyə. 9 rəqibdən hamısı “Qarabağ”ı keçə bilərmi? 8-ci turda bu 9 komandanın 2-si bir-biri ilə qarşılaşacaq. Yəni “Brügge” “Marsel”i qəbul edəcək. Bu isə o deməkdir ki, istənilən halda 1 rəqib sıradan çıxacaq. Pley-offa vəsiqəni təmin etmək üçün azı 24-cü pilləni tutmaq lazımdır. Bunun üçünsə daha 2 rəqibin xal ehtiyatını “Qarabağ”a çatdırmaması gərəkir. Bu, möcüzə nəticəsində mümkündür. Möcüzə baş verə bilərmi? Oyunları sadalayım, özünüz qərar verin.

20-ci yerin sahibi “Bayer” “Vilyareal”ı, 22-ci pillədəki PSV isə “Bavariya”nı qonaq edəcək. Yalnız bu cütlüklərdə meydan sahiblərinin qalib gəlməsi ehtimalı böyükdür. Çünki “Vilyareal” formada deyil, 7 oyuna cəmi 1 xal toplayıb. “Bavariya” isə 1/8 finala vəsiqəni təmin edib və meydana arxayın çıxa bilər. Digər rəqiblərimizdə isə vəziyyət fərqlidir. 21-ci pillədəki “Monako” “Yuventus”u qəbul edəcək. Turinlilərin özlərinə ilk “səkkizliy”ə düşmək üçün qələbə çox vacibdir. 23-cü yerdəki “Atletik” evdə “Sportinq”lə oynayacaq. “Sportinq” 10-cu yerdədir və 13 xalı var. Bu komanda da 1/8 finala vəsiqə üçün qələbə qazanmalıdır. “Olimpiakos” “Ayaks”la səfərdə qarşılaşacaq. “Ayaks”ın 6 xalı var və qələbə sayəsində pley-offa düşə bilər. “Napoli”nin rəqibi “Çelsi” olacaq. Hansı ki, xal itirəcəyi təqdirdə 8-ci yerdəki mövqeyini əldən verəcək və pley-offa düşəcək. Nəhayət, “Kopenhagen” “Barselona”nın qonağı olacaq ki, danimarkalıların bu rəqibdən xal alması inandırıcı deyil. Qısası, gərək “Bayer”, “Monako”, PSV, “Atletik”, “Olimpiakos”, “Napoli”, “Kopenhagen” – bunlardan azı 6-sı qalib gəlməlidir ki, “Qarabağ” pley-offdan kənarda qalsın. İnandırıcıdır?

Yeri gəlmişkən, Liqa mərhələsindəki digər türk klubumuz “Qalatasaray”ın da azarkeşlərini təbrik edirik. Riyazi hesablamaları kənara qoyub məntiqə inansaq, Türkiyə təmsilçisi də 10 xalla pley-offda iştirakını təmin edib. Son turda səfərdə “Mançester Siti”yə məğlub olsa belə. Üstəlik, pley-offda “Qarabağ”la “Qalatasaray”ın qarşılaşması ehtimalı az deyil. Bu isə başqa söhbətin mövzusudur.

İlqar TAĞIYEV

525-ci qəzet .- 2026.- 23 yanvar (№3).- S.23.