Səmimi minnətdarlıq haqqını qazanmaq

MİNGƏÇEVİR DÖVLƏT UNİVERSİTETİ TƏHSİL MÜHİTİMİZDƏ VƏ TƏLƏBƏLƏRİNİN HƏYATINDA ÖNƏMLİ ROL OYNAYIR

Mənim ali təhsil yolum mərhələli və çoxşaxəli şəkildə formalaşıb. İlk olaraq Azərbaycan Dövlət Aqrar Universitetində bakalavr pilləsi üzrə təhsil almış, daha sonra həmin istiqamət üzrə magistratura səviyyəsini uğurla başa vurmuşam. Bununla yanaşı, yaradıcılıq sahəsinə olan marağım məni bu istiqamət üzrə fəaliyyət göstərən ayrıca bir ali təhsil müəssisəsində təhsil almağa sövq etmiş və Mədəniyyət Nazirliyi ilə Azərbaycan Yazıçılar Birliyinin birgə təsis etdiyi Gənc Ədiblər Məktəbində, onunla paralel olaraq Bakı Slavyan Universitetində "Yaradıcılıq" fakültəsində təhsil almışam.

Akademik biliklərimi daha da zənginləşdirmək, idarəetmə sahəsində nəzəri və praktiki bacarıqlarımı inkişaf etdirmək məqsədilə hazırda Mingəçevir Dövlət Universitetində "Dövlət və bələdiyyə idarəetməsi" ixtisası üzrə təhsil alıram. Bu təhsil mərhələsi mənim üçün yalnız yeni biliklərin əldə edilməsi deyil, eyni zamanda analitik düşüncə, strateji yanaşma və ictimai idarəetmə sahəsində peşəkar formalaşma baxımından ciddi əhəmiyyət kəsb edir.

Universitet yalnız auditoriyalardan və imtahanlardan ibarət deyil. O, gənc nəslin düşüncəsinin formalaşdığı, şəxsiyyətin yetişdiyi və gələcəyin qurulduğu bir elm ocağıdır. Bu müqəddəs məkanın əsas dayaqları isə şübhəsiz ki, onun rəhbərliyi və müəllim heyətidir.

Universitetimizin rektoru Anar Eminov təhsil prosesinə yenilikçi baxışı, tələbələrə olan diqqət və qayğısı, eləcə də elmə verdiyi dəyər ilə seçilən bir rəhbərdir. Onun rəhbərliyi altında universitetimiz yalnız bilik verən deyil, eyni zamanda sağlam düşüncəli, məsuliyyətli və vətənpərvər gənclər yetişdirən bir təhsil müəssisəsinə çevrilib.

Mingəçevir Dövlət Universitetində təhsil prosesinin yüksək səviyyədə təşkili və səmərəli həyata keçirilməsi universitet rəhbərliyinin və müəllim heyətinin peşəkar fəaliyyətinin nəticəsidir. Bu baxımdan rektor Anar Eminovun ali təhsilin inkişafına yönəlmiş ardıcıl və məqsədyönlü fəaliyyəti xüsusi qeyd olunmalıdır. Onun rəhbərliyi altında universitetdə müasir təhsil mühiti formalaşdırılıb, tələbəyönümlü yanaşma və keyfiyyətli tədris prinsipləri uğurla tətbiq edilib.

Eyni zamanda Ömür Boyu Təhsil Məktəbinin direktoru Vəfa Məhərrəmovanın təşkilatçılıq bacarığı və məsuliyyətli yanaşması təhsil proqramlarının effektiv icrasında mühüm rol oynayıb. Tədris prosesində tələbələrə daim dəstək göstərən, səmimi münasibəti və gülərüzlülüyü ilə seçilən tyutor Nuranə Əlizadənin də xidmətləri təqdirəlayiqdir.

Təhsil müddətində müxtəlif fənlərin yüksək səviyyədə tədrisini həyata keçirən müəllimlər də xüsusi təşəkkürə haqq qazanıblar. Hacıyev Azər "Mikroiqtisadiyyat" fənnini özünəməxsus və anlaşılan metodlarla tədris edib, Əliyeva Təranə "Karyera planlaması" fənninə maraq yaradıb, Quliyeva Şəlalə "Siyasi elmin əsasları"nı elmi əsaslarla öyrədib, Nurlana Hüseyn isə "İnsan resurslarının idarə olunması" fənnini mükəmməl şəkildə izah edib.

Adları qeyd olunan ziyalılar öz bilik və təcrübəsini əsirgəmədən bölüşərək tələbələrin həm nəzəri biliklərinin, həm də praktiki bacarıqlarının formalaşmasına dəyərli töhfələr veriblər. Onların əməyi təhsil alanların gələcək peşəkar inkişafında mühüm rol oynayır.

Müəllimlərimiz bu böyük yolun səssiz, lakin əvəzsiz qəhrəmanlarıdır. Onların peşəkarlığı və tələbələrə fərdi yanaşması ilə, dərin elmi bilikləri və izahlı dərs metodu ilə, səmimiyyəti və motivasiyaedici münasibəti ilə yadda qalır. Çünki hər biri yalnız fənn tədris etmir, eyni zamanda tələbələrə həyat dərsi verirlər.

Bu müəllimlər öz bilik və təcrübələrini əsirgəmədən bölüşür, tələbələrin yalnız akademik deyil, mənəvi inkişafına da ürəkdən çalışırlar. Onların səyi nəticəsində tələbələr tənqidi düşünməyi, məsuliyyət daşımağı və özünə inanmağı öyrənir.

Bu münasibətlə Mingəçevir Dövlət Universitetinin rəhbərliyinə, müəllim heyətinə və tədris prosesində əməyi olan bütün şəxslərə dərin təşəkkür bildirilir, onlara gələcək fəaliyyətlərində uğurlar arzulayıram!

Ramil MƏRZİLİ

Azərbaycan Yazıçılar Birliyinin və Dünya Gənc Türk Yazarlar Birliyinin üzvü

525-ci qəzet .- 2026.- 30 yanvar (№4).- S.22.