Xalq rəssamı
Rafis İsmayılovun
70 yaşı tamam olub
Martın 30-da Azərbaycanın
xalq rəssamı Rafis İsmayılovun anadan olmasının
70 illiyi tamamlanıb. Həyatını milli kinomuzun və
teatrın inkişafına həsr edən bu istedadlı sənətkarın
adına bədii filmlərdə, teatr tamaşalarında
quruluşçu rəssam, cizgi filmlərində isə
rejissor, rəssam, ssenarist kimi tez-tez rast gəlmək olar. Yubileyi
münasibətilə Azərbaycan Professional Kinorejissorlar
Gildiyasının Bürosu da Rafis İsmayılovu təbrik
edib, ona cansağlığı, yeni uğurlar arzulayıb.
Qeyd edək ki, Rafis Rza
oğlu İsmayılov 30 mart 1939-cu ildə Bakı şəhərində
ziyalı ailəsində anadan olub. 1962-cı ildə Ə.Əzimzadə
adına Azərbaycan Dövlət Rəssamlıq Məktəbini,
1972-ci ildə isə Moskva Ümumittifaq Dövlət
Kinematoqrafiya İnstitutunun rəssamlıq fakültəsini
bitirib. Həmin ildən "Azərbaycanfilm"
kinostudiyasında işləyir. 30-dan artıq bədii filmin rəssamlıq
üzrə quruluşunu həyata keçirən sənətkarın
istedadı, kinematoqrafın bütün janrlarında
özünü büruzə verib. O, "Qatır Məmməd",
"Sevinc buxtası",
"Üzeyir ömrü",
"Qara gölün cəngavərləri", "Qəribə adam",
"Oxuyur Müslüm
Maqomayev", "1001-ci qostrol",
"Yapon və yaponiyalı", "Pirverdinin
xoruzu", "Dantenin
yubileyi", "Anın
quruluşu", "Özgə
ömür", "Təhminə"
kimi filmlərdə işləyərək, hər
janra uyğun plastika və rəng çalarları, orijinal tərtibat üsulları tapıb. Beləliklə də, filmlərin bədii keyfiyyətinin yüksək professional səviyyədə alınmasına
xidmət göstərib.
Azərbaycan
Milli Dram Teatrında "Gecə döyülən
qapılar", "Tənha iydə ağacı", "Fedra",
"Misir gecələri", "Ölüləri qəbristanlıqda
basdırın", "İkinci səs", Opera və Balet
Teatrında isə "Natəvan", "Leyli və Məcnun","Məhəbbət
və ölüm", "Rast", "Trubadur" əsərlərinin
quruluşçu-rəssamı olaraq teatr dekoru sənətinin
inkişafına öz töhfəsini verib. "Danışan
işıqlar", "Xeyir və Şər",
"Göyçək Fatma", "Lağım" cizgi
filmlərinin quruluşçu-rəssamı, "Oda"
filminin rejissoru, ssenaristi və rəssamı olan Rafis
İsmayılov "Xətai", "Metexan", "Romeo və
Cülyetta", "Spartak", "Oliver Tvist",
"Qaçaqlar", "Kventin Dorvard" və başqa
kitablara illustrasiyalar yaradıb. Atalar sözləri, Dədə
Qorqud motivləri və xalq mahnıları mövzusunda
çox sayda rəsm əsərinin müəllifidir. O,
dünyada məşhur olan qədim Təbriz miniatür məktəbinin
ənənələrini davam etdirərək, dəzgah rəngkarlığı
və miniatür üslubunda axtarışlar aparır və
bu sahənin inkişafına çalışır. Rafis
İsmayılov xalq rəssamı fəxri adına layiq
görülüb, əsərləri Dövlət
Mükafatı və rəssamlıq üzrə Sultan Məhəmməd
mükafatı ilə təltif edilib. Ölkəmizdə və
xaricdə açılan bir çox sərgilərdə
iştirak etmiş Rafis İsmayılov Professional Kinorejissorlar
Gildiyasının, Kinematoqrafçılar
İttifaqının və Rəssamlar İttifaqının
üzvü kimi milli mədəniyyətimizin ictimai həyatında
fəal iştirak edən, öz həmkarları, dostları
arasında hörmət və nüfuza malik sənətkardır.