Şairin ilk kitabı təqdim olunub

Gözdən Əlil Uşaqlar üçün Respublika İnternat Orta Məktəbində gözdən əlil Şəhriyar Həsrətin "Dünya, aç qapını çıxım gedim" kitabının təqdimat mərasimi keçirilib. Tədbir "Uşaq ili" çərçivəsində "Qafqaz Media" İctimai Birliyinin (İB) dəstəyi ilə baş tutub.

Təqdimat mərasimində çıxış edən məktəbin direktoru Namidar Hüseynquliyev, şair Ədalət Əsgəroğlu, "Qafqaz Media" İB-nin sədri Azadə Taleh və başqaları yeni kitabla bağlı fikirlərini bölüşüblər.

Çıxış edənlər bildiriblər ki, dünyəvi gözəllikləri öz ürəyində yaşadan, duyğularını kövrək misralara çevirən Şəhriyar Həsrət gələcəyin böyük şairi ola bilər: " Onun şeirlərində Vətənə məhəbbət, həyata sevgi, gələcəyə inam hissi üstünlük təşkil edir".

Şair-publisist, filologiya elmləri namizədi Xədicə Muradın dəstəyi ilə Azərbaycan Universitetinin nəşriyyatında çap olunan kitabda Şəhriyar Həsrətin 300-ə yaxın şeiri yer alıb.

Tədbirdə Təhsil Nazirliyinin nümayəndələri və ayrı-ayrı şəxslər məktəbli şairə hədiyyələr bağışlayıblar.

Sonda Şəhriyar Həsrət xeyirxah insanlara minnətdarlığını bildirib, yeni şeirlərini oxuyub.

Sevinc MÜRVƏTQIZI

525-ci qəzet.- 2009.- 8 aprel.- S.7.