Gecə gözlü qadının
yazılmamış şeirləri
Gecəni sevə-sevə
Gözlərinə
köçürmüşdü.
Gözü üstə
yer vermişdi
bir cüt hilala,
Gecə gözlü
qadın.
Bu misralar gecə
gözlü qadının - Həyat Şəminin bir
şeirindən götürülüb. Həyat Şəmi
qarabağlıdır, Füzulidə anadan olub.
Boya-başa
çatdığı, ilk şeirlərini yazdığı
bayatı ab-havalı Qarabağ düşmən
işğalı altındadı, Vətənin Qarabağ
yarası köz tutmamış bir yaradı. Bu gün
bütün qarabağlı türk qadınları "gecə
gözlü qadınlardı". Onlardan biri də bu
misraları qələmə almış şairin
özüdür.
Saçlarını
ağardan şəhid anası,
Başın
üstündə
Dərdə ağ bayraq
qaldırma!
Qırmızıya boya
qara günləri,
Al-qana boya...
Ocaq qala,
Bizi döyüşə
səsləsin,
Şəhid anası!
2009-cu il Həyat Şəmi
üçün uğurlu olub. Bu il iki kitabı işıq
üzü görüb. "Gecə gözlü həyat"
Bakıda "E.L" Nəşriyyat və Poliqrafiya şirkətində,"Yazılmayan
şeirlər" isə Ankarada "Özləm
Yayınevi" tərəfindən nəfis şəkildə
çap olunub. Bundan öncə "Adamlar" adlı ilk
şeir kitabını oxumuşdum.
Həyat Şəminin
şeirlərində gecə, ay, yuxu, işıq, səhər,
torpaq, vaxt və bəxt sözlərinə tez-tez rast gəlirik:
"Bir yol gəldin vaxtlı, vaxtsız, bəxtli, bəxtsiz";
"O qız da Aya oxşayırdı";
"Torpağının altı üstündən qiymətlidir
bu məmləkətin"; "Ana torpaq gözəllərin
gözəli, bu gözəlin laylasına qurbanam"...
Bir şair kimi Həyat
Şəminin oxucu ilə dialoqu səmimidir. Misralar
arasında, sevib-sevilən, hardasa bir az sadəlövh
görünən qadın ürəyinin
çırpıntıları duyulur:
Yadına
düşür,
Orucunu göz
yaşınla açdığın gün?
Yaxud:
Gəldim, ötürəm
dünyadan,
Ötürəm, ay
adamlar...
Daha bir örnək;
Göylə Yer
arasında
Bir ömür
sıxır məni.
Yer yerdən itələyir,
Göy göydən
yıxır məni...
Şairin Qarabağ
torpağında doğulub boya-başa
çatdığını, orada ilk şeirlərini
yazdığını yuxarıda qeyd etmişdik. Təsadüfi
deyil ki, Qarabağ mövzusu Həyat xanımın
yaradıcılığından qırmızı, bəlkə
də qanlı xətt kimi keçir. Çünki Həyat
Şəmi bu şeirləri yurd nisgilli ürəyinin qanı
ilə yazır:
Ay yurduma gedən elli,
Qarabağlı şirin
dilli,
Gözləri həsrətdən
selli,
Vətən iyi gətirərsən.
"Dədəli
düzündən gələn güllə səsləri
üzümə dəydi 23 avqust Füzulisində..." deyən
Həyat xanımın bu ruhda yazılmış onlarla dəyərli
şeiri var.
Ankarada çap olunmuş
"Yazılmayan şeirlər" kitabını Türkiyə
türkcəsinə Oqtay Hacımusalı, Özkan Özan və
Dəniz Gölpınar uyğunlaşdırıblar. Sivas
Cumhuriyyət Universitetinin İlahiyyat fakültəsinin dosenti
Alim Yıldız kitaba yığcam bir ön söz yazıb. Kitabda
xalq şairi, millət vəkili Sabir Rüstəmxanlının
"Həyat Şəmi yaradıcılığına
baxış" adlı məqaləsi də yer alıb. Bu nəşrin
oxucular üçün maraqlı ola biləcək bir cəhəti
də orada Həyat Şəminin sevdiyi şairlərdən
etdiyi tərcümə nümunələrinə də yer
verilməsidir və bu bölümdə 4 şairin 15 şeiri
toplanıb. İnanıram ki, bu kitab Həyat Şəminin
önəmli yaradıcılıq nailiyyəti olmaqla bərabər,
həm də onun yeni uğurlarının müjdəçisidir.
525-ci qəzet.- 2009.- 10 aprel.- S.7.