Kinorejissor Tofiq İsmayılovun yubileyi qeyd olunub

Aprelin 8-də Rəşid Behbudov adına Mahnı Teatrında xalq artisti, görkəmli kino xadimi Tofiq İsmayılovun anadan olmasının 70, yaradıcılığının 50 illiyinə həsr edilmiş yaradıcılıq gecəsi keçirilib. Tədbirin aparıcısı professor Rafael Hüseynov əvvəlcə görkəmli rejissorun keçdiyi həyat yoluna nəzər salıb. R.Hüseynov bildirib ki, Sovet repressiyaları dövründə "xalq düşməni"nin oğlu kimi dünyaya gələn Tofiq İsmayılov öz istedadı və fəaliyyəti sayəsində xalq artisti adını qazanıb. Uzun illər kino sahəsində çalışan T.İsmayılov 30-dan artıq bədii və sənədli filmin rejissorudur. Azərbaycan milli kinosunda ilk çoxseriyalı və uşaq filmləri məhz onun adı ilə bağlıdır. T.İsmayılovun Azərbaycan kinosunun inkişafındakı xidmətləri təkcə bundan ibarət deyil. O həm də 20 ildən artıq Azərbaycan İnsəcənət Universitetində pedaqoq kimi çalışıb. Bu gün onun yetirmələri arasında 30 xalq artisti, 50- dən artıq əməkdar artist var.

Mədəniyyət və Turizm nazirinin müavini Ədalət Vəliyev nazir Əbülfəs Qarayevin yubilyara ünvanladığı təbrik məktubunu oxuyub. Xalq artistləri Amaliya Pənahova, Əminə Yusifqızı və başqaları da çıxış edərək, T.İsmayılova xoş arzularını çatdırıblar. Tədbirdə T.İsmayılovun yaradıcılığını əks etdirən sənədli film və fotoqalereya, eləcə də müəllifi olduğu filmlərdən kadrlar nümayiş etdirilib.

Aynur QULİYEVA

525-ci qəzet.- 2009.- 11 aprel.- S.23.