"Sıravi
Dursun" Bakı Uşaq Teatrının səhnəsinə çıxacaq
Bakı Uşaq
Teatrı "Sıravi Dursun" tamaşasını təqdim
edib. Bu barədə teatrın direktoru, rejissor İntiqam Soltan
məlumat verib. Direktorun dediyinə görə, vətənpərvərlik
mövzusunda hazırlanan tamaşa əsgərlik yaşına
çatmış gənclərə həsr olunub. Tamaşada
çağırışçı Dursunəlinin əsgəri
xidmətdən boyun qaçırmaq üçün min
cür hiyləyə əl atması təsvir edilib. O,
gününü hərbi hissənin tibb məntəqəsində
keçirərək, xidmətə yaramadığını
sübut etmək istəyir. Üstəlik, burada tibb məntəqəsinin
baş həkimi ilə tez-tez mübahisəyə girir.
Komediya janrında
hazırlanan tamaşada Bakı Uşaq Teatrının 3 aktyoru
rol alıb. "Sıravi Dursun" tamaşasının musiqi
tərtibatçısı Mahir İbrahim, rəssamı isə
Sevda Məmmədovadır. Rejissorun dediyinə görə,
tamaşanın cəbhə bölgələrində xidmət
edən hərbçilər qarşısında da
nümayişi nəzərdə tutulur.
Sevinc MÜRVƏTQIZI