Firəngiz Əlizadə:
"Telekanallarda Bədii Şuranın yaradılmasına
ehtiyac yaranıb"
Azərbaycan Bəstəkarlar
İttifaqının mahnı və estrada musiqisi bölməsinin
iclası keçirilib. APA-nın məlumatına görə,
İttifaqın sədri Firəngiz Əlizadənin
iştirakı ilə keçirilən iclasa qurumun katibi Eldar
Mansurov sədrlik edib. E.Mansurov son illər mahnı
yaradıcılığı sahəsində xoşagəlməz
halların artdığını, qeyri-peşəkar və təsadüfi
adamların özlərini "bəstəkar"
adlandıraraq, bu sənətə baş vurub, maliyyə
imkanlarının hesabına efiri zəbt etdiklərini söyləyib.
Belə hallar üzündən bəstəkarlıq sənətinin
nüfuzuna xələl gəldiyini söyləyən E.Mansurov
mahnı janrından, sənət növündən daha
çox insanların şüuruna təzyiq vasitəsi kimi
istifadə edildiyini dilə gətirib. O, həmkarlarından
artıq həyəcan təbilinin
çalındığı bir məqamda belə bir vəziyyətin
normallaşdırılması istiqamətində təkliflər
və bu istiqamətdə birgə fəaliyyət gözlədiklərini
qeyd edib: "Peşəkar bəstəkarların əsərləri
bu gün efirdə səsləndirilmir. Bəstəkarlıq sənətini
təhqir etmək olmaz. Küçədən gedən
sıradan bir şəxs də özünə bəstəkar
desin, mən də. Lazımdırsa, lap telekanallara müraciətlər
göndərərək, qeyri-peşəkar musiqi ilə
peşəkar bəstəkarın
yaradıcılığına fərq qoyulmasını tələb
etmək lazımdır".
Bəstəkarlar
İttifaqının sədri Firəngiz Əlizadə
mahnı sənəti sahəsində yaşanan
nöqsanların nəinki peşəkar musiqiçiləri, hətta
sadə insanları da narahat etdiyini vurğulayıb:
"İnsanlar mənə tez-tez zəng edib Bəstəkarlar
İttifaqının sədri kimi bu acınacaqlı vəziyyətin
aradan qaldırılması üçün lazımi
ölçülər götürülməsini tələb
edirlər. Bəlkə də efirdə səslənən
musiqilərin 10 faizi peşəkar bəstəkarların, 90
faizi isə qeyri-peşəkarların payına
düşür. Aranjemançılar özləri etiraf edirlər
ki, internetdən hazır standart qəlibləri axtarıb tapır,
hərəsindən bir parçanı götürüb birləşdirib,
mahnı formasına salırlar. Halbuki, onların heç not
və ya partitura yazmaq bacarığı yoxdur. Bu məsələləri
nizamlamaq üçün telekanallarda Bədii Şura
yaradılmasına ehtiyac yaranıb. İstərdik
ki, sağlam rəqabətin yaranması üçün bəstəkarlar
öz əsərlərini bu şuralara təqdim etsinlər.
Telekanalların musiqi redaksiyalarına Bəstəkarlar
İttifaqının üzvlərinin cəlb edilməsini
çox istərdik. Bununla yanaşı bəstəkarlarımız
müasir tələbata cavab verən keyfiyyətli əsərlər
yaratmalı və əsərlərini özləri aranjeman etməlidir".
Bəstəkarlardan Sərdar
Fərəcov, Mobil Babayev, Vüqar Camalzadə, Nadir Əzimov
da Bədii Şura yaradılmasının vacibliyini
vurğulayıblar.
İclasın sonunda
çıxışlarda vurğulanan problemlərin aradan
qaldırılması məqsədilə atılacaq
addımlar müzakirə olunub və müvafiq qərarlar qəbul
edilib.