“Cəhənnəmin kirayənişinləri”nin premyerası uğurla keçib

Səməd Vurğun adına Dövlət Rus Dram Teatrının səhnəsində Mədəniyyət və Turizm Nazirliyinin sifarişi ilə xalq yazıçısı Elçinin “Cəhənnəmin kirayənişinləri” pyesi əsasında hazırlanan tamaşanın premyerası keçirilib. Əsərin mövzusu 1930-cu illər repressiyaları dövründə bir sovet məmurunun satqınlığından və onun tanrı tərəfindən necə lənətlənməsindən bəhs edir. Bütün hadisələr yeni il gecəsi saatın əqrəbləri on ikinin üstündə dayanan zaman baş verir. Tamaşada fantastik və gülüş doğuran səhnələr də öz əksini tapıb. Ümumiyyətlə, tamaşanın dekorasiyası, yüksək keyfiyyətli işıq effektləri, rəqs nümunələri və aktyorların öz rollarını məharətlə canlandırmaları səhnə əsərinin uğurunu təmin edib. Tamaşaçılar yaradıcı heyəti ayaq üstə alqışlayaraq, teatr kollektivinin bu yeni sənət uğurundan razı qaldıqlarını bildiriblər. Rejissor Kamran Şahmərdanın quruluş verdiyi tamaşada baş rolları xalq artistləri Səfa Mirzəhəsənov, Yuriy Baliyev və aktrisa Mələk Abbaszadə oynayırlar.

Premyeraya əsərinə müəllifi olan xalq yazıçısı Elçin, mədəniyyət və turizm naziri Əbülfəs Qarayev və bir çox tanınmış mədəniyyət xadimləri tamaşa ediblər.

Günel MUSAYEVA

525-ci qəzet.- 2009.- 22 dekabr.- S.7.