Nüfuzlu sərgilərə layiq əsərlər

Azərbaycan Dövlət Mədəniyyət və İncəsənət Universitetinin foyesində açılmış təsviri sənət əsərlərinin sərgisinə gələnlər həm də burada fərqli bir mənzərənin şahidi olurdular. Ustalıqla düşünülmüş qrimin köməkliyi ilə Azərbaycan Rəssamlıq sənətinin fəxri Səttar Bəhlulzadəyə oxşadılmış tələbə-rəssam əlində fırça qarşısında molbert sərgiyə gələnləri qarşılayır. Bu məqam onsuz da öz parlaq rəngləri ilə üzə gülən sərgiyə daha oynaq, şux ovqat bağışlayırdı.

ADMİU – nun rektoru, professor Timuçin Əfəndiyev giriş sözu ilə çıxış edərək söylədi ki, tamaşaçılara təqdim edilən ekspazisiya dahi fırça ustasının anadan olmasının 100 illiyinə bir tələbə töhfəsidir. Rəssam, dizayner ixtisasları üzrə universitetdə təhsil alan gənclərimiz Səttar Bəhlulzadənin əlamətdar yubileyinə əliboş gəlmək istəməyiblər.

Sərginin tamaşaçıları arasında təkcə tələbə və müəllimlər deyil, görkəmli sənət xadimləri, rəssamlar, nəzəriyyəçilər də iştirak edirdilər. Açılışda iştirak edən xalq rəssamı Ağali İbrahimov, rəssamlıq fakültəsinin dekanı Sevda Sadıxbəyova bu sərginin dövlət başçımız cənab İlham Əliyevin dahi rəssamın yubileyinin ölkə miqyasında keçirilməsi barədə verdiyi tapşırıqlara layiqli cavab kimi qiymətləndirdilər, mərhum sənətkar haqqında xatirələr, fikirlər söylədilər. Sərgidə nümayiş olunan 100 yaxın rəsm və dekorativ sənət nümunələrinin demək olar ki, hamısı Səttar sənətkarlığının işığından bəhrələnmiş, onun ənənələrindən su içmiş sənət nümunələri idi.

Əksər tamaşaçıların da qeyd etdiyi kimi əgər rəsm əsərlərinin altında müəlliflərinin adları yazılmasaydı, baxanlar onları adlı-sanlı rəssamların fırçasının məhsulu kimi dəyərləndirərdi. Əslində isə bütün rəng qammaları, kompazisiya quruluşları ilə Səttar sənətkarlığının qan qardaşları olan həmin əsərlərin müəllifləri ADMİU-nun rəssamlıq fakültəsinin tələbələri idi.

Günay Abdulsalamovanın “Düşüncələrim”, Aydan Tağıyevanın “Sakitlik”, Fidan Seyidovanın “Dağlar”, Gülzar İmanlının “Oyanış”, Lalə Hüseynovanın “Laləzar”, Aytən Kazımovanın “Fırtına”, Nicat İbadovun “Bahar”, Əfruz Məmmədovanın “Dənizin səsi” əsərlərinin isə hər hansı nüfuzlu sərgi salonlarının bəzəyi ola biləcəyi qənaətinə gəldilər.

Açılış mərasimi ən yaxşı əsər müəlliflərinin mükafatlandırılması ilə tamamlandı. Tələbə – rəssamlardan Ayşən Nadirova, Rəna Allahverdiyeva, Nigar Muxtarova, Lalə Hüseynova ADMİU-nun həmkarlar komitəsinin təsis etdiyi mükafatlara layiq görüldülər. Mükafatları təqdim edən professor Timuçin Əfəndiyev tələbələrə daha böyük sənət uğurları arzuladı.

Gündüz

525-ci qəzet.- 2009.- 25 dekabr.- S.7.