Dünya Ədəbiyyatı
Kitabxanasından növbəti
6 kitab təqdim olunub
Bugünlərdə 150 cildlik Dünya Ədəbiyyatı Kitabxanasına (DƏK) daxil olan növbəti 6 kitabın təqdimatı keçirilib. Nəşrlər sırasına A.S.Puşkinin, Y.Əmrənin, Nazim Hikmətin seçilmiş əsərləri, L.Tolstoyun seçilmiş əsərlərinin birinci cildi, Daniel Defonun Robinzon Kruzo əsəri və İngilis ədəbiyyatı antologiyası daxildir. Xəzər Universitetində keçirilən təqdimat mərasimində çıxış edən Kitab Klubunun direktoru Elxan Rzayev DƏK-ə abunə yazılışının uğurla getdiyini bildirib. E.Rzayev indiyədək abunənin əsas hissəsinin aparıldığını, insanlarda kitaba, xüsusən də dünya ədəbiyyatına marağın daha da artdığını söyləyib.
Bakı Slavyan Universitetinin (BSU) prorektoru Asif Hacıyev indiyədək 70-dən artıq
kitabın nəşrə
hazır olduğunu bildirib: Onlardan 30-u nəşriyyata təqdim edilib. Tərcümə
edilmiş daha 20 kitab üzərində işlər davam edir. Nəşrə hazırlanan 70 kitabdan 40-a yaxını orijinaldan yeni tərcümə edilib. Prorektor DƏK toplusunun hazırlanması
üçün BSU-da
şərait yaradıldığını,
ayrıca otaqlar ayrıldığını, avadanlıqlar
alındığını çıxışında önə
çəkib.
Tutunəşriyyatının
direktoru Tərlan Qorçu, Şərq-Qərb
mətbəəsinin nümayəndəsi
Rövşən müəllim
dünya ədəbiyyatı
toplusunun nəşrini
dövlət tərəfindən
aparılan əhəmiyyətli
iş kimi dəyərləndirib.
Xatırladaq ki, bundan əvvəl DƏK-dən Anton Çexovun, Jül Vernin, Vilyam Şekspirin seçilmiş əsərləri,
Sədi Şirazinin Gülüstan, Bustan, Homerin İliada və Odisseya poemaları nəşr olunub.
Sevinc MÜRVƏTQIZI
525-ci qəzet.- 2009.- 25 dekabr.- S.7.