İctimai Televiziyada xalq yazıçısı
Elçinin yaradıcılıq
gecəsi olub
Ölkəmizin görkəmli söz-sənət
adamlarının yaradıcılığını
mütəmadi olaraq işıqlandırmaq, geniş
tamaşaçı auditoriyası
ilə ünsiyyətini
təşkil etmək
İctimai Televiziyada ənənə halını
alıb. Yaşadığımız
keçid dövrü
həm də ədəbiyyatın öz
bədii-estetik və ideya istiqamətlərinin axtarış dövrü
kimi səciyyələnir.
Həyatı yeni rakursdan
işıqlandırmaq, zamanın
ictimai-iqtisadi münasibətlərinə
müasir meyarlarla yanaşmaq üçün
ədəbi mühitimizin
aparıcı söz sahiblərinin irsini daha dərindən öyrənmək, orada yaxşı nə varsa, seçib götürmək indi daha artıq əhəmiyyət kəsb
edir. Qabil, Xəlil Rza
Ulutürk, Bəxtiyar
Vahabzadə, Hüseyn
Arif, Fikrət Qoca, Sabir Rüstəmxanlı
və digər görkəmli şair və yazıçılarımızın
yaradıcılıq gecələrinin
keçirilməsi sözügedən
kanalın öz ictimailik missiyasına sadiqliyinin təzahürü
olmaqla yanaşı, həm də yuxarıda qeyd etdiyimiz ədəbi varislik kimi nəcib
bir məsələnin
həllinə dəstək
kimi qiymətlidir.
Bu günlərdə İctimai
Televiziyada növbəti
bir yaradıcılıq
yüksək səviyyədə
keçirilib. Tanınmış ədəbiyyat və
teatr xadimlərinin iştirak etdiyi tədbirdə yazıçının
çoxşaxəli ədəbi-bədii
yaradıcılığı, elmi fəaliyyəti ətraflı və geniş şəkildə
tamaşaçılara çatdırılıb.
İctimai Televiziyanın
studiyasında keçirilən
gecədə verilişin
müəllifi və aparıcısı Yusif Günaydın xalq yazıçısının
çoxillik yaradıcılığına,
onun bədii nəsr, dramaturgiya, publisistika və ədəbiyyatşünaslıq sahəsindəki fəaliyyətinə
diqqət yönəldib.
Söhbət zamanı
yazıçı-dramaturq və
ədəbiyyatşünas alim Elçin aparıcının suallarını
cavablandırmaqla həm
də öz ədəbi-bədii yaradıcılığının
üzərinə yenidən
işıq salıb. Tamaşaçılarla səmimi ünsiyyət
quran ədib müasir ədəbi mühitin problemlərinə,
çağdaş ədəbiyyatımızda
insan-cəmiyyət, dil,
milli-mənəvi dəyərlər
kimi vacib məsələlərin öz
əksini tapmasına münasibət bildirib, oxucuları düşündürən
bir çox mətləblərə
aydınlıq gətirib.
Yazıçının müəllifi olduğu tamaşalarda baş rolları ifa etmiş xalq artistləri Səyavuş
Aslan, Bəsti Cəfərova, şair İlyas Tapdıq öz çıxışlarında
Elçinin yaradıcılığı
ilə bağlı düşüncələrini dilə
gətiriblər. Verilişdə
“Mənim ərim dəlidi” tamaşasından
və “Bağ mövsümü” filmindən
fraqmentlər göstərilib,
xanəndələr xalq
mahnıları, muğamlardan
parçalar ifa ediblər.
SARA
525-ci qəzet.- 2009.- 26 dekabr.- S.21.