“Şirvanşahlar dövləti” və “Bakı şəhərinin tarixi” təqdim edilib

Dövlət Neft Akademiyasında görkəmli tarixçi alim Sara Aşurbəylinin bu il yenidən nəşr olunmuş “Şirvanşahlar dövləti” və “Bakı şəhərinin tarixi” kitablarının təqdimatı keçirilib. Tədbir sözügedən təhsil müəssisəsinin rektorluğu və Heydər Əliyev adına “Azərbaycan-Qazaxıstan” Dostluq Cəmiyyətinin təşkilatçılığı ilə gerçəkləşib. S.Aşurbəylinin kitablarının yenidən nəşrinin təşəbbüskarı da “Azərbaycan-Qazaxıstan” Dostluq Cəmiyyətidir. Cəmiyyətdən verilən məlumata görə, kitabların nəşrinə Moskvadakı “Almaz” Elm İstehsalat Birliyinin baş direktoru İqor Aşurbəyli yardım edib.

Akademiyanın rektoru, əməkdar elm xadimi, akademik Siyavuş Qarayev çıxışında Azərbaycanın beynəlxalq əlaqələrinin get-gedə genişləndiyini xüsusi vurğulayaraq Azərbaycan və Qazaxıstan arasında sıx əlaqələrin yaradıldığını bildirib. S.Qarayev Sara Aşurbəylinin əsərlərinin böyük əhəmiyyətə malik olduğunu deyib.

Qazaxıstanin ölkəmizdəki səfiri S.Primbetov təqdim olunan əsərlərin Azərbaycanın böyük tarixinin aynası olduğunu, Vətənə, dünyaya çoxlu istedadlar bəxş edən Azərbaycan torpağına böyük məhəbbət hissi ilə qələmə alındığını diqqətə çatdırıb. Kitabların təqdimat mərasimində “Azərbaycan-Qazaxıstan” Dostluq Cəmiyyətinin vitse-prezidentləri, ölkəmizin görkəmli ədəbiyyat və incəsənət xadimləri Ömər Eldarov, Çingiz Abdullayev, Oqtay Mirqasımov və başqaları iştirak ediblər.

Görüş zamanı ali məktəbin kiçik akt salonunda rəssamlar Sabir Çopuroğlunun və Təranə Məmmədovanın əsərlərindən ibarət sərgi də nümayiş etdirilib. Görüşün sonunda Azərbaycanın Aktaudakı baş konsulu Rəşad Məmmədov iki ölkə arasında dostluq əlaqələrinin daha da möhkəmləndirilməsi istiqamətində görülən tədbirlərlə əlaqədar “Azərbaycan-Qazaxıstan” Dostluq Cəmiyyətinin üzvlərinə və cəmiyyətin prezidenti Eldar Günaydına minnətdarlıq edib.

SARA

525-ci qəzet.- 2009.- 10 dekabr.- S.7.