Azərbaycanlı şairənin adı Almaniyada nəşr olunan ensiklopediyada yer alıb

Almaniyanın birləşməsinin 20 illiyi münasibətilə “Who is who” (Kim kimdir”) Hübner nəşriyyatı bu ölkədəki nüfuzlu kişi və qadınlardan ibarət xüsusi yubiley ensiklopediyası buraxıb. İki cilddə nəfis şəkildə tərtib edilən ensiklopediyada Almaniyanın siyasətində, iqtisadiyyatında və mədəniyyətində görkəmli yer tutan şəxslərdən bəhs olunur. Nəşrdə 22 min 200 şəxsin fotosu, biblioqrafiyası və ünvanı yer alıb. APA-nın məlumatına görə, nəşrdə yeganə azərbaycanlı olaraq, Almaniyada N.Gəncəvi adına Azərbaycan Mədəniyyət İnstitutunun direktoru Nuridə Atəşinin bioqrafiyasına yer verilib.

O, ensiklopediyada mədəniyyət xadimi, yazıçı, şairə və Almaniyada N.Gəncəvi adına Azərbaycan Mədəniyyət İnstitutunun direktoru, dünya şöhrətli azərbaycanlı yazar Məhəmməd Əsəd Bəyin (Qurban Səidin) tədqiqatçısı, Azərbaycanın minillik klassik ədəbiyyatının “Pərvanə və şam” adlı antologiyasının alman dilinə tərcüməçisi və Qafqaz Amazonlarının tədqiqatçısı kimi təqdim olunub. Bundan başqa, N. Atəşi ensiklopediyada “Qafqazın vəhşi Amazonu” təxəllüsü ilə verilib.

525-ci qəzet.- 2009.- 15 dekabr.- S.7.