"Fokus"un yeni sayı işıq üzü görüb

Azərbaycan mətbuat tarixində ilk analitik kino jurnalı olan "Fokus"un 3-cü sayı çapdan çıxıb. Bu sayda müasir Türkiyə kinosu haqqında bir sıra məqalələr çap olunub. Məsul redaktor Sevda Sultanovanın sözlərinə görə, bir çox xüsusiyyətlərinə görə müasir Türkiyə kinosu Azərbaycan kinematoqrafına nümunə ola bilər. Ən azı kommersiya filmləri və müəllif kinosunun paralel inkişafı baxımından bu fikir əsaslı səslənir. Yeri gəlmişkən, türkiyəli kino mütəxəssisləri "Fokus" jurnalı haqda yüksək rəy veriblər. Çünki Türkiyədə belə formatda jurnal yoxdur. Kino jurnalları Türkiyədə analitik formatda yox, daha çox "xəbər" formatında çıxır.

"Master-klas" rubrikasının qonağı bəstəkar Xəyyam Mirzəzadədir. Müasir kinonun aktual problemlərilə bağlı fikirlərini X.Mirzəzadə kifayət qədər açıq və kəskin tərzdə "Fokus"un oxucuları ilə bölüşüb. Mədəniyyət və turizm nazirinin müavini Ədalət Vəliyev isə dövlətin kino siyasətini mahiyyəti barədə şərh verib. "Nazirliyin ekspert şurası müstəqildirmi", "Prodüser mərkəzlərini dövlət dəstəkləyəcəkmi", "Mənəvi deqradasiyanın qarşısını necə almaq olar" kimi suallara Ə.Vəliyevin müsahibəsində cavab tapmaq mümkündür.

Jurnalın təsisçilərindən olan Əli İsa Cabbarovun sözlərinə əsasən, bu nömrədə şəxsən onun üçün ən ümdə məqamlarından biri Alla Axundovanın yeni ssenarisinin nəşridir. "Şərikli çörək", "Alma almaya bənzər", "Bizi bağışlayın" filmlərinin ssenari müəllifi Alla Axundovanın kino mətnləri uzun müddətdir ki, Azərbaycanda ekranlaşdırılmır. Ə.İ.Cabbarov ümid edir ki, yeni ssenarisinin çapı Alla Axundovanın Azərbaycan kinosuna qayıdışı olacaq. Jurnalın bu sayında Nərmin Kamalın, Teymur Daiminin, Vəfa Cəfərova, Orxan Eyp, Vüsal Məmmədov və Füzuli Sabiroğlunun məqalələri də çap olunub.    

Aynur QULİYEVA

525-ci qəzet.- 2009.- 17 fevral.- S.7.