Yazıçı-publisist Yusif Əhmədovun
70 illiyi qeyd edilib
Tanınmış yazıçı-publisist Yusif
Əhmədovun 70 illik
yubileyinə həsr olunmuş mərasim keçirilib. Tədbir Yazıçılar
Birliyi (AYB) və Yeni Yazarlar və
Sənətçilər Qurumunun
(YYSQ) birgə təşkilatçılığı
ilə baş tutub. Bu barədə
məlumat verən
AYB-nin mətbuat katibi Ədalət Əsgəroğlu bildirib
ki, tədbirdə çıxış edən
professor Nizaməddin Şəmsizadə
Yusif Əhmədovun əsərlərinin bədii
dəyərindən söz
açıb və onların məziyyətlərini
qeyd edib.
Şair-publisist Ramiz Məmmədzadə Y.Əhmədov haqqında
dəyərli əsərlər
müəllifi olmaqla bərabər, yüksək
insani keyfiyyətlərə
malik şəxsiyyət
kimi də söz açıb.
"Ədəbiyyat qəzeti"nin baş redaktoru Ayaz Vəfalı yubilyarın əsərlərinin gənc
nəslin təlim-tərbiyəsi
baxımından ciddi əhəmiyyət daşıdığını
vurğulayıb.
Professor
Qəzənfər Paşayev
də qələm dostunun ədəbiyyatımızdakı
xidmətlərindən bəhs
edib.
YYSQ-nin sədri kulturoloq Aydın Xan yazıçının
"Ələkeçməzlər" çağdaş detektiv romanı haqqında fikirlərini bölüşüb:
"Yazıçı əsəri
oxunaqlı dildə, özünəməxsus ədəbi-estetik
üslubda qələmə
alıb. Romanda şər qüvvələrə
qarşı hüquq-mühafizə
orqanları əməkdaşlarının
apardığı qızğın
mübarizə öz əksini tapıb. Lakin yazıçı bu detektivi ilə həm də göstərib ki, yaşadığımız cəmiyyətin
şərə müqaviməti
heç də həmişə uğur qazanmır".
Tədbirin sonunda
yubilyar qələm dostlarına və qonaqlara yaradıcılığı
haqqında söylənilən
xoş sözlərə
və ona ünvanlanan səmimi arzulara görə minnətdarlığını bildirib.
525-ci qəzet.-
2009.- 21 fevral.- S.26.