Süleyman Ələsgərovun
85 illik yubileyi qeyd olunub
M. Maqomayev
adına Dövlət Filarmoniyasında xalq artisti, bəstəkar
Süleyman Ələsgərovun 85 illiyi ilə bağlı
xatirə gecəsi keçirilib. Xalq artistləri Fərhad Bədəlbəyli, bəstəkar
Siyavuş Kərimi, əməkdar incəsənət
xadimi, professor Ağaverdi Paşayev və başqaları tədbirdə çıxış
edərək Süleyman
Ələsgərovla bağlı
xatirələrini bölüşüblər:
" S.Ələsgərovun yaradıcılığı Azərbaycan
peşəkar musiqi tarixinin ən parlaq səhifələrini
təşkil edir. Onun əsərləri Azərbaycan xalq musiqisinin ən yaxşı ənənələrini
özündə əks
etdirir. S.Ələsgərov
"Bahadır və Sona"" operasının,
12 musiqili komediyanın,
"Bayatı-şiraz""
simfonik muğamının,
simfonik orkestr üçün üverturanın,
2 simfonik poemanın, 4
kantatanın, müxtəlif
mahnı və romansların müəllifidir".
Tədbirdə
bəstəkarın pedaqoji fəaliyyətindən də
söz açılıb. Onun 1956-cı ildən Üzeyir
Hacıbəyli adına Azərbaycan Dövlət
Konservatoriyasında dərs dediyi və istedadlı
musiqiçilər yetişdirdiyi vurğulanıb: " S.Ələsgərov
bu gün musiqi həyatının müxtəlif sahələrində
fəaliyyət göstərən yüzlərlə
ifaçı və bəstəkar hazırlayıb, yeni
musiqiçi nəslinin yetişməsində əhəmiyyətli
işlər görüb".
Tədbirin
sonunda bəstəkarın əsərləri əməkdar incəsənət
xadimi, professor Ağaverdi Paşayevin rəhbərliyi ilə
dövlət xalq çalğı alətləri orkestrinin
ifasında səsləndirilib.
S.MÜRVƏTQIZI