Moskva Dövlət Universitetinin Bakı filialının rəsmi açılışı olub

PREZİDENT İLHAM ƏLİYEV BU TƏHSİL OCAĞININ YARANMASININ AZƏRBAYCAN-RUSİYA MÜNASİBƏTLƏRİNDƏ MÜHÜM ƏHƏMİYYƏTƏ MALİK OLDUĞUNU BİLDİRİB

Dünən prezident İlham Əliyevin iştirakı ilə Mixail Lomonosov adına Moskva Dövlət Universitetinin (MDU) Bakı filialının rəsmi açılış mərasimi keçirilib. Mərasimdə millət vəkili, Heylər Əliyev Fondunun prezidenti Mehriban Əliyeva, Bakıda səfərdə olan Rusiya Prezident Administrasiyasının rəhbəri Sergey Narışkin, Rusiyanın təhsil və elm naziri Andrey Fursenko, MDU-nun rektoru Viktor Sadovniçi, Azərbaycanın Rusiyadakı və Rusiyanın Azərbaycandakı səfirləri Polad Bülbüloğlu ilə Vasili İstratov və başqa şəxslər iştirak ediblər.

Öncə Filialın rektoru, professor Nərgiz Paşayeva qonaqları tədris ocağı ilə tanış edib.

Açılış mərasimində çıxış edən prezident İlham Əliyev Azərbaycanda daha bir ali təhsil ocağının açılmasından şad olduğunu, filialın ölkədə aparıcı universitetlərdən birinə çevriləcəyinə inandığını bildirib. Dövlət başçısı açılış mərasimində Rusiya Prezident Administrasiyası rəhbərinin, təhsil və elm, energetika nazirlərinin və MDU-nun rektorunun iştirakından çox məmnun olduğunu deyib. Bu filialı Azərbaycanda yaratmaq ideyasının hələ bir neçə il əvvəl meydana çıxdığını qeyd edən prezident MDU-nu Rusiyanın ən qabaqcıl ali təhsil ocağı adlandırıb. O bu ideyanın Rusiya tərəfindən dəstəkləndiyini, Rusiya rəhbərliyi ilə keçirdiyi görüşlərdə bu məsələni müzakirə etdiyini söyləyib. İ.Əliyev bu filialın açılmasının Azərbaycan-Rusiya əməkdaşlığının inkişafında mühüm əhəmiyyət kəsb etdiyini vurğulayıb: "Bu bizim münasibətlərin yüksək səviyyədə olmasının, Rusiyanın Azərbaycana diqqətinin göstəricisidir. Biz də öz növbəmizdə təhsil ocağına dövlət dəstəyi göstərəcəyik".

Ölkə prezidenti ali təhsil ocağının binasının müasir tələblərə cavab verdiyini söyləməklə yanaşı, əsas məsələnin burada təhsilin səviyyəsinin MDU-nun standartlarına cavab verməsi olduğunu diqqətə çatdırıb.

Sergey Narışkin filialın açılmasını iki ölkənin həyatında mühüm hadisə olduğunu bildirib: "Bu, MDB məkanında da vacib hadisədir. Xüsusən o baxımdan ki, bu il MDB-də Gənclər İli elan olunub". O, filialın açılmasında həlledici roluna və rus dilinə diqqətlə yanaşmasına görə prezident İlham Əliyevə minnətdarlığını bildirib: "Azərbaycanda rus dilinə böyük diqqət yetirilir. Moskva Dövlət Universitetinin Bakı filialı ölkələrimiz arasında strateji tərəfdaşlıqda növbəti körpüdür".

MDU-nun rektoru Viktor Sadovniçi isə filialı açmaq ideyasının belə tezliklə reallaşmasını "möcüzə" adlandırıb: "Moskva Dövlət Universiteti bu işdə prezident İlham Əliyevin səylərini çox yüksək qiymətləndirir. Universitetimizin professorları məmnuniyyətlə Bakı filialında dərs deməyə gəlirlər".

Filialın rektoru Nərgiz Paşayeva tədris ocağının yaranmasına göstərdikləri yardıma görə Azərbaycan və Rusiya rəhbərliyinə minnətdarlığını bildirib.

Mərasimin sonunda S.Narışkin Azərbaycan və rus xalqları arasında dostluq münasibətlərinin inkişafında xidmətlərinə görə Nərgiz Paşayevaya "Roszarubejsentr"in Fəxri Nişanını təqdim edib.

Sevinc QARAYEVA

525-ci qəzet.- 2009.- 28 fevral.- S.2.