Milli Dram Teatrının Türkiyə qastrolu maraqlı keçib

Azərbaycan Dövlət Akademik Milli Dram Teatrı Türkiyənin dörd şəhərində qastrol səfərində olub. Direktor Maqbet Bünyadovun verdiyi məlumata görə, teatrın tarixində yeni mərhələ təşkil edən və son iki ildə baş tutan bu qastrol səfərləri zamanı Azərbaycan səhnə sənətinin tarixi və nailiyyətləri haqqında Türkiyə teatrsevərlərinə geniş bilgi verilib: "Onlar repertuarımızdakı ən uğurlu tamaşalarla tanış olublar. Türkiyənin müxtəlif mərkəz şəhərlərində və vilayətlərində nümayiş etdirdiyimiz tamaşalar yaddaqalan və əlamətdar keçib, iki qardaş ölkə arasındakı mədəni əlaqələrin inkişafına əhəmiyyətli töhfə olub". Direktor 136-cı teatr mövsümünün sonuncu qastrol səfərinin xüsusilə uğurlu keçdiyini vurğulayıb. O deyib ki, kollektiv Türkiyədəki iki önəmli tədbirdə -Tarsus şəhərində dövlət səviyyəsində keçirilən "III Türk Dünyasının Teatr Günləri"ndə və "Türksoy"un Karaman şəhər Bələdiyyəsi ilə birgə keçirdikləri "Türk Dil Bayramı" çərçivəsində baş tutan mərasimdə iştirak edib. Sonuncu tədbirə Türkiyə prezidenti Abdullah Gül və hökumət nümayəndələri də qatılıblar. Qastrolda rejissor Ağakişi Kazımovun quruluşunda səhnə həllini tapan B.Vahabzadənin "Özümüzü kəsən qılınc" tamaşası türkiyəli tamaşaçılar tərəfindən alqışlarla qarşılanıb. Teatr kollektivinə mükafatlar və xatirə hədiyyələri təqdim olunub.

SARA

525-ci qəzet.- 2009.- 1 iyul.- S.7.