Sara Aşurbəylinin kitabları təqdim edilib
Rusiya Mədəniyyət
və İnformasiya Mərkəzində (RMİM) Azərbaycanın
tanınmış tarixçi alimi, professor Sara Aşurbəylinin
"Bakı şəhərinin tarixi" və
"Şirvanşahlar dövləti" adlı
kitablarının təqdimat mərasimi keçirilib. Azərbaycan, rus və ingilis dillərində
olan kitablar "Azərbaycan-Qazaxıstan" Dostluq Cəmiyyətinin
təşəbbüsü və rəhbərliyi, Moskvada fəaliyyət
göstərən "Almaz" elmi-istehsalat birliyinin baş
direktoru İ.Aşurbəyovun dəstəyilə nəşr
edilib.
Tədbirdə
iştirak edənlərə Sara Aşurbəylinin həyat və
yaradıcılıq yolu barədə ətraflı bilgi
verilib. Qeyd edilib ki, o, 1906-cı ildə Bakıda doğulub.
1925-ci ildə İstanbulda Müqəddəs Janna d-Ark
adına kolleci, 1930-cu ildə Bakı Dövlət
Universitetinin şərqşünaslıq, 1941-ci ildə isə
Azərbaycan Pedaqoji İnstitutunun xarici dillər fakültələrini
bitirib: "O, Yaxın və Orta Şərq xalqları
tarixinin bilicisi olmaqla yanaşı, həm də rəssam və
musiqiçi idi. Ağır təqib illərində yaşamaq
üçün bu bilik və bacarıqlarından istifadə
edib. Sara xanım dram teatrında rəssam və dekorator
işləyib, müəllimi Uzeyir Hacıbəyovun dəvətilə
15 il Konservatoriyada xarici dildən dərs deyib, eləcə də
öz çəkdiyi rəsm əsərlərini sataraq
dolanıb. Sərgilərdən birində onun
"Göygöl" əsərini Meksika nümayəndələri
alıb aparıblar. Həmin əsər hazırda Meksika
muzeyində saxlanılır. 1946-cı ildə Sara xanım Azərbaycan
Rəssamlar İttifaqının üzvü seçilib".
S.Aşurbəyli sonralar Azərbaycan Tarixi Muzeyində elmi
işçi kimi fəaliyyət göstərib, 1993-cü ildən
ömrünün sonuna qədər Akademiyanın Arxeologiya və
Etnoqrafiya İnstitutunun aparıcı elmi işçisi olub.
525-ci qəzet.- 2009.- 4 iyul.- S.22.