Gənc Ədiblər Məktəbinin 1 yaşı tamam
oldu
1 il bundan əvvəl
fəaliyyətə başlayan Gənc Ədiblər Məktəbi
aradan keçən qısa zaman ərzində müəyyən
uğurlara imza atıb, ədəbi mühitdə
tanınıb və ətrafına topladığı
istedadlı gənclərin sevimli görüş yerinə
çevrilib. Xatırladaq ki,
Gənc Ədiblər Məktəbi prezident İlham Əliyevin
yaradıcı gənclərə qayğı göstərilməsi
məqsədi ilə müəyyən dövlət
qurumlarına həvalə etdiyi vəzifələrə
uyğun olaraq, Mədəniyyət və Turizm Nazirliyi ilə
Yazıçılar Birliyi (AYB) tərəfindən təşkil
edilib. Məktəbin əsas məqsədi ədəbi
yaradıcılıq sahəsində fəaliyyət göstərmək
arzusunda olan, bu sahədə yeni addımlar atan 15-35 yaş
arasındakı yaradıcı nəsli bir araya gətirmək,
onların imzalarını üzə çıxarmaq,
ümidverici gənclərin yaradıcılıq vərdişlərini
inkişaf etdirmək, onları tanıtmaq, gənclərin
yaratdığı ədəbi nümunələrin əcnəbi
dillərə tərcümə və nəşrini dəstəkləməkdir.
Eyni zamanda, gənc yazıçı, şair və publisistlərin
əsərlərinin nəşri, oxucularla görüşlərinin
təşkili, onların yaradıcılığına aid
televerilişlərin hazırlanması, gənclərin əsərlərinin
müsabiqələr yolu ilə
mükafatlandırılması, ədəbi gəncliyin
yaradıcılıq seminarlarının keçirilməsi,
almanaxların nəşri, ədəbi nümunələrin əcnəbi
dillərə tərcüməsi, beynəlxalq ədəbiyyat
festivallarında iştiraka şərait yaradılması,
ustad dərslərinin təşkili Gənc Ədiblər Məktəbinin
(GƏM) başlıca fəaliyyət istiqamətləri kimi
müəyyənləşib. AYB-nin katibi Rəşad Məcidin
rəhbəri olduğu məktəbdə bir illik fəaliyyət
dövründə məşğələlərdə gənc
ədiblərin əsərləri müzakirə edilib,
toplantılara tanınmış şair və
yazıçılar dəvət olunaraq, konkret və aktual
mövzulara aid ustad dərsləri keçirilib, üzvlərin
əsərləri müxtəlif mətbu orqanlarda dərc
edilib, o cümlədən "Ulduz" jurnalının aprel
sayı bütünlüklə məktəb üzvlərinin
ixtiyarına verilib. Məktəbin əsas uğurlarından
biri isə bu ilin əvvəlində 25 gəncin
Yazıçılar Birliyi üzvlüyünə qəbul
edilməsidir.
Qeyd edək ki, gələcəkdə iki illik fəaliyyətin
yekunlarına görə müəyyən
yaradıcılıq vərdişlərinə yiyələnmiş
GƏM üzvlərinə Mədəniyyət və Turizm
Nazirliyinin sertifikatları təqdim olunacaq.
İyulun 4-də Gənc Ədiblər Məktəbinin
(GƏM) üzvləri növbəti dəfə M.F.Axundov
adına Milli Kitabxanada toplaşıblar. Tədbiri giriş
sözü ilə açan Rəşad Məcid bir il ərzində
əldə olunan uğurlardan danışaraq, istedadlı gənclərin
bir araya gəlməsindən məmnunluğunu bildirib. Məktəbə
üzv olan gənclərin əksəriyyətinin gələcəkdə
Azərbaycan ədəbiyyatına dəyərli əsərlər
bəxş edəcəyinə, öz imzalarını ədəbi
uğurlarla təsdiqləyəcəyinə
inandığını bildirən R.Məcid qarşıda GƏM-lə
bağlı bir sıra layihələrin nəzərdə
tutulduğunu vurğulayıb. Məktəb üzvlərinin
budəfəki qonağı İlqar Fəhmi olub. Gənclərlə
fikirlərini bölüşən İ.Fəhmi əvvəlcə
özünün mənsub olduğu 90-cılar ədəbi nəslinin
yaradıcılığının spesifik xüsusiyyətlərindən
danışıb. Gənclərə çoxsaylı oxucu
kütləsi qazanmaq üçün dəyərli tövsiyələr
verən İ.Fəhmi bunun üçün onlara ən
müxtəlif ədəbi janrlara müraciət etməkdən
çəkinməməyi məsləhət görüb.
Bununla bərabər, o, hansı janrda yazmaqdan asılı
olmayaraq, gənclərin öz imzalarına ciddi münasibət
bəsləməsinin zəruriliyini, ədəbiyyata qeyri-ciddi
yanaşmanın yolverilməz olduğunu dilə gətirib. Gənclərin
suallarını cavablandırandan sonra İ.Fəhmi qəzəllərini
oxuyub.
Sevinc MÜRVƏTQIZI