Hamlet... Fuad Poladov... Zaur...
"TEATRIN
eşidilməyən üçüncü
zəngləri" silsiləsindən...
Hamlet - V.Şekspir "Hamlet" faciəsi. Müdrik gənc...
Fuad Poladov - Hamleti geyinən adam... (xalq artisti) İstedadlı gənc...
Zaur - Anar "Təhminə və Zaur". Sevən gənc...
Aktyorlar. Onlar hər yeni obrazının rəngini, ruhunu, kədərini və sevincini, günahını və savabını öz varlığında Buqələmun kimi bulunduğu mövcudiyyətə uyğunlaşdıran sadə adamlardılar. Həddindən artıq, SADƏ. Lap elə, Fuad kimi...
Beləcə...
Onun ömür SV-si... Axtarıb internetdən tapdım ki, xalq artistidir. Fəqət, məni heç vaxt maraqlandırmadığı kimi, indi də maraqlandırmır. O qədər xalq artisti var ki...
Ancaq... Nə bilim... Sonra qarşıma uzun bir filmoqrafiyası çıxdı... 37 filmdə iştirak edib... Bunlar gözəl işlərdi, ancaq yenə maraqlanmadım... Mən ki, Fuad Poladovun filmlərini axtarmırdım... Bəs, mən axtaran hardadır?!. Bəlkə heç yoxdur?...
Fəqət...
Birdən Uran planeti ilə əlaqəli olan astroloji qatımda mənə nə isə qəribə bir xəbər gəldi. Mən Fuad Poladovu yox... Onun oynadığı üç obrazı çılğın, müdrik HAMLETİ, məsuliyyətsiz, bütün qadağalara tüpürüb sevən və klişelərə ilişib qalan ZAURU, aktyorluğun "ilahi qat"ında korifey kimi gəzinən adamın FUADIN Poladovdan süzülüb gələn bəşəri faciəsindən yazmaq, onda məhrəm sirləri axtarmaq qərarına gəldim...
Yəni...
Mənim yazmaq istədiyim, içinə girib ilmə-ilmə axtardığım SİRLƏR var. Bunlardan birincisi FUAD POLADOV+HAMLET məxfiliyinin, gizliliyinin faş olunması, üzə çıxmasıdır.
Virtual məkanın dərinliyində gizlənmiş "vikipedia" adlı ensiklopediyada Fuadın Hamleti barəsində belə bir sətir gedir. "Teatrın dəvəti ilə Fuad Poladov 29 mart 2002-ci ildə Akademik teatrda Vilyam Şekspirin eyniadlı faciəsində Hamlet rolunu uğurla oynayıb".
HAMLET kimdir? Hərdən fikirləşirəm ki, bəlkə də həqiqəti dərk etmək, bu dünyanın saxta pərdələrini cırmaq hamımıza nəsib olan deyil... Bu pərdələrin ardındakı həqiqəti anlamaq, neçə illərdir içində yaşadığın gerçəklikdən imtina etmək boşluqda hardansa yapışmağa yer axtarmağa bənzəyir. Hamletin həqiqəti bir az da o boşluğun içindəki, dayaqların, süni yapışmaq yerlərinin, parçalanması, yoxa çıxmasıdır. Doğurdanmı? Ziqmund Freydin "EDİP KOMPLEKSİ" mənim bu biçarə "Hamlet"imin kral əlbisəsinin boynundan yapışıb buraxmır.
Və hələ də tapa bilmədiyim növbəti sual. Hamlet Ofelyanı monastıra yollayarakən orda onun paklanacağına doğurdanmı inanırdı?!. Mən inanmırdım. Heç indi də inanmıram.
FƏQƏT...
Fuad Poladovun Hamleti bütün əzəməti, lənətlənmiş suallarla dolu tarixi ilə modern mifdir. Miflər "winzip" olunmuş sənədlər toplusudur. Fuad özündə hamletin bəşəri faciəsi ilə birlikdə insanlığın qadağan olunmuş suallarını da belə vinzip etdi, sıxdı... İndi bizə xalq artistimizin öz düşüncəsinin, dünyanı qavrama biçiminin köməyi ilə yaradılmış "HAMLET"i açmaq düşürdü.
Amma...
Yox... Məgər bütün qadağan olunmuş gizli sualların cavabları da qadağan olunmayıbmı?!. Elə isə, bu sirr olaraq qalacaq. Kimsə SİRləri, qadağaları aşa bilirsə, bax o, "NİTŞE" olur, O, "FÖVQƏLİNSAN" olur... Hamletin məhrəmliyinə bu qədər girib onu beləcə faş etmək bəlkə elə fövqəl insan olmağa doğru atılmış ilk addımdır?!. Bəlkə də... Kim bilir?
ANAR+FUAD POLADOV = ZAUR...
İndi isə EŞQdən danışaq. Bu yerdə adamın qəlbindən yunan miflərində ən sevdiyi tanrılardan biri "EROS"u çağırmaq istəyi keçir. Öncə, elə burdaca "Ağ liman"ından başlamış, "Beşmərtəbəli evin altıncı mərtəbəsinə" qədər gedib çıxan Təhminə və Zaurun məhəbbəti və bu məhəbbətdə Zaurun əzabları... Zaur mənə yazıq, çarəsiz ancaq bütün varlığı ilə sevən bir gənci xatırlatdı. Gəlin, Zauru evdəki maddi təminatdan asılılıq və digər xırda söhbətlərə bulamadan, sadəcə Təhminəni sevməsinə nəzər salaq. Onun Təhminəsi azad yaşayan qadın kimi küçə fahişəliyinə çıxsaydı belə, Zaur onu sevəcəkdi... Ancaq Zaur sonda bütün tabulara qarşı mübarizə apara bilmədiyinə və şərqlə qərbin arasında şərqi seçməli olduğuna görə məni təəssüfləndirdi... kədərləndirdi və ağlatdı...
Və əlbətdə ki, Zaurun içində bir Anar kriptosu yatır ki, o da əbədi "vinzip olunmuş" modern mifdir. Sirdir... və niyəsə bu SİRRin içində Anarın əzablarını, aça bilmədiyim məhrəm iztirablarını görürdüm...
Fuad Poladovun Zauru 24 yaşlı Fuaddır. Burda nə Sirr axtarmaq lazımdı, nə naməlum, gizli bir qat.
Anarın gənclik, sevgi və "EROS" tanrısına olan münasibətinin toqquşmasının üstünə Fuadın məşhur və yaraşıqlı aktyorun sevgi macəraları gəlincə bu biçarə Zaur yəqin ki, Təhminəni "Afrodita" kimi görürmüş... Bəlkə də Zaur sadəcə sevirdi...
Əziz oxucular! Sonda "Təhminə və Zaur"a görə ANARA, "Hamlet" faciəsinə (bu faciə deyil, insanlığın ən biabırçı komediyasıdır... Z.Q) görə V.ŞEKSPİRƏ, Zaurun və Hamletin ruhlarını geyindiyinə görə FUAD POLADOVA təşəkkürlər...
Fəqət...
Düşündüm ki,
virtual boşluqdan, dünya
hörümçək torundan
tapdığım kiçik
bir mətni diqqətinizə çatdırım.
Maraqlı olsa oxuyarsınız... Fuad Poladovun yaradıcılıq
izləri...
"Lirik-psixoloji üslublu aktyorluq məktəbinin qabaqcıl
sənətkarlarından biridir.
İstedadının formalaşdığı
bu üslubun çoxqatlı çalarlarına
istinad edən aktyor fəlsəfi-dramatik
və faciə rollarını məharətlə
oynayır. Fuad Ağarəhim oğlu Poladov 1948-ci il may ayının 24-də Bakıda
doğulub. Sənətə
1966-cı ildə "İstintaq
davam edir" filmində çəkildiyi
Səlim rolu ilə gəlib. ADİİ-nin dram və kino aktyorluğu fakültəsini bitirib
(1967-1972). Sənət müəllimi
Tofiq Kazımovun dəvəti ilə tələbə ikən Akademik Milli Dram Teatrında hazırlanan İlyas Əfəndiyevin
"Məhv olmuş gündəliklər" pyesinin
tamaşasında Savalan
rolunu oynayıb. Premyerası 1969-cu il noyabrın 29-da göstərilən
tamaşadan sonra Fuad Poladov teatrın
aktyor truppasına daxil olub. İyirmi
il bu kollektivdə
işləyən sənətkar
1989-cu ildən Səməd
Vurğun adına Azərbaycan Dövlət Rus Dram Teatrının aktyorudur. Xalq artistidir. Fuad Poladovun səhnədə yaratdığı bütün
obrazların taleyi ifa baxımından uğurlu olub. Aktyorun yüksək sənətkarlıqla oynadığı
Rəhman, Valeh, Qədim, Mübarək Səltənə ("Mahnı
dağlarda qaldı",
"Qəribə oğlan",
"Büllur sarayda"
və "Şeyx Xiyabani", İlyas Əfəndiyev), Cığatay
("Yağışdan sonra",
Bəxtiyar Vahabzadə),
Fərhad ("Məhəbbət
əfsanəsi", Nazim
Hikmət), Şahbaz bəy ("Müsyö
Jordan və dərviş
Məstəli şah",
Mirzə Fətəli
Axundzadə), Şöklü
Məlik ("Torpağa
sancılan qılınc",
Nəbi Xəzri), Zaur ("Təhminə və Zaur", Anar), Baron ("Həyatın
dibində", Maksim Qorki) rolları yüksək bədii dəyərli səhnə
surətləridir. Teatrın
dəvəti ilə Fuad Poladov 29 mart 2002-ci ildə Akademik teatında Vilyam Şekspirin eyniadlı faciəsində Hamlet rolunu
uğurla oynayıb. Fuad Poladov səhnədə
düşünməyi, düşüncələrini
fəlsəfi dəyərlərlə
çatdırmağı, ən
adi obraza da psixoloji ahəng
verməyi bacarır. Fuad Poladovun səhnə plastikası ifa etdiyi obrazın
psixoloji və emosional duyğularına uyğun şəkildə
dəyişir. Bu yaradıcılıq
xüsusiyyətləri hər
dəfə yeni ölçü-biçidə və orijinal təqdimdə tamaşaçılara
çatdırılır. Fuad
Poladov obraza ictimai dəyər gətirməyi, ona psixoloji-sosial mahiyyət aşılamağı sevən
və bunu yüksək peşəkarlıqla
öz oyununda realizə edən aktyordur".
Ziyad QULUZADƏ