Xaricdə təhsil
almaq imkanı qazanan tələbələrlə
görüş keçirilib
ELMAR QASIMOV: "YÜKSƏK
BİLİYƏ MALİK GƏNCLƏRİMİZİN
DÜNYANIN NÜFUZLU UNİVERSİTETLƏRİNDƏ TƏHSİL
ALMASI ÜÇÜN DÖVLƏT TƏRƏFİNDƏN HƏR
CÜR ŞƏRAİT YARADILIR"
Dünən Təhsil
Nazirliyində "2007-2015-ci illərdə Azərbaycan gənclərinin
xarici ölkələrdə təhsili üzrə Dövlət
Proqramı" çərçivəsində
dünyanın nüfuzlu ali məktəblərinə qəbul
olunan tələbələrlə görüş
keçirilib. Tədbirdə çıxış edən təhsil
nazirinin müavini Elmar Qasımov deyib ki, 2007-ci ildə
prezidentin müvafiq sərəncamı ilə təsdiq edilən
"2007-2015-ci illərdə Azərbaycan gənclərinin
xarici ölkələrdə təhsili üzrə Dövlət
Proqramı" uğurla həyata keçirilir. Proqramın əsas
məqsədi rəqabət qabiliyyətli iqtisadi sistemin
formalaşdırılması və davamlı inkişafın təmin
edilməsi baxımından ölkənin müasir tələblərə
cavab verən kadrlara ehtiyacının ödənilməsindən
ibarətdir. Eyni zamanda, Azərbaycan gənclərinin ümumbəşəri
dəyərlər əsasında layiqli ali təhsil
almaları üçün lazımi şəraitin
yaradılması, istedadlı gənclərin dünyanın
aparıcı ölkələrində təhsil almaq
imkanlarının genişləndirilməsi prosesinin mütəşəkkilliyinin
və səmərəliliyinin artırılmasını təmin
etmək də önəmli məqsədlərdir. Proqramın
şərtlərinə əsasən, bu tələbələrin
bütün xərcləri dövlət tərəfindən
ödənilir: "2008-09-cu tədris ilində bu proqram
çərçivəsində dünyanın 19 ölkəsinin
yüksək reytinqə malik 81 ali məktəbində bakalavr,
magistratura, rezidentura, aspirantura və doktorantura pillələrində
Azərbaycan üçün əhəmiyyət kəsb edən
priritet ixtisaslar üzrə 186 nəfər azərbaycanlı gənc
təhsil alıb. Başa çatan tədris ilində bunlardan
35 nəfərinin məzun olacağı gözlənilir.
2009-10-cu tədris ilində Dövlət Proqramı çərçivəsində
təhsil alacaq gənclərin sayının iki dəfə
artaraq, təxminən 400 nəfərə çatacağı
nəzərdə tutulub. Bunun üçün Təhsil
Nazirliyi, İqtisadi İnkişaf Nazirliyi və Dövlət
Neft Fondu tərəfindən lazımi tədbirlər
görülüb. Belə ki, bu günə qədər xarici
ölkələrdə Dövlət Proqramı çərçivəsində
təhsil almaq üçün müraciət edənlərdən
177 nəfər gəncin sənədləri təsdiqlənmək
üçün Prezident yanında Təhsil üzrə
Komissiyaya təqdim olunub. Xaricdə təhsil almaq
üçün namizədliyi irəli sürülən 54 nəfər
haqqında artıq müvafiq qərar qəbul edilib". E.Qasımov
vurğulayıb ki, 2007-ci ilə qədər Azərbaycandan
xarici ölkələrə müxtəlif proqram və layihələr
çərçivəsində təhsil almağa tələbələr
göndərilirdi. Gənclərin təhsilin müxtəlif
pillələri üzrə təhsil alması
üçün xaricə göndərilməsi yüzfaizli
dövlət təminatı səviyyəsində həyata
keçirilmirdi. Ancaq prezidentin müvafiq sərəncamından
sonra bu iş dövlət səviyyəsində həyata
keçirilməyə başladı: "Ölkədə
müxtəlif sahələrdə bir sıra proqramlar həyata
keçirilir. Ancaq bu proqramlar içərisində ən əhəmiyyətlisi
"2007-2015-ci illərdə Azərbaycan gənclərinin
xarici ölkələrdə təhsili üzrə Dövlət
Proqramı"dır. Bu proqram prezident İlham Əliyevin irəli
sürdüyü neft kapitalını insan kapitalına
çevirməklə bağlı ideya və prinsiplərini həyata
keçirir. Hazırda Dövlət Proqramı çərçivəsində
dünyanın 17 ölkəsinin yüksək reytinqə malik
olan 81 ali məktəbində Azərbaycan üçün
prioritet ixtisaslar üzrə 186 nəfər gənc təhsil
alır. Birinci il 71, ikinci il 135, bu il isə 200-ə yaxın tələbənin
təhsil almaq üçün xarici ölkələrə
göndərilməsi planlaşdırılır. Sevindirici
haldır ki, 2007-08-ci tədris ilində Dövlət Proqramı
çərçivəsində xaricdə təhsil alan 7 nəfər
artıq məzun olaraq Azərbaycana dönüb. Onlar artıq
bir mütəxəssis kimi müxtəlif dövlət idarələrində
əmək fəaliyyətinə başlayıblar". Nazir
müavini qeyd edib ki, gənclərin xarici ölkələrdə
təhsil almağa göndərilməsi işinin təməli
illər öncə ümummilli lider Heydər Əliyev tərəfindən
qoyulub. Məhz onun təşəbbüsü ilə 70-80-ci
illərdə onlarla azərbaycanlı gənc keçmiş
SSRİ-nin nüfuzlu ali məktəblərinə təhsil
almaq üçün göndərilib. Bu tələbələr
təhsillərini başa vurduqdan sonra Azərbaycana
qayıdıb və ölkənin inkişafı
üçün çox ciddi işlər görüblər:
"Gənclərin xarici ölkələrin nüfuzlu ali məktəblərində
təhsil alıb mütəxəssis kimi yetişməsi Azərbaycanda
milli kadr potensialının formalaşmasında mühüm
rol oynayıb. 1970-ci ildə respublikadan kənarda təhsil
almağa göndərilən gənclərin sayı 70 nəfər
idisə, 70-ci illərin sonunda 900 nəfər, 80-ci illərin əvvəllərində
isə ildə 1000-1400 nəfər olub. Həmin dövrdə,
ümumilikdə, 15 mindən çox gənc Sovetlər
Birliyinin nüfuzlu ali məktəblərində müxtəlif
ixtisaslar üzrə təhsil aldıqdan sonra vətənə
qayıdaraq, ölkəmizin iqtisadi, mədəni və elmi
potensialının gücləndirilməsinə öz layiqli
töhfələrini veriblər. Azərbaycan dövlət
müstəqilliyini əldə etdikdən sonra da bu məsələ
diqqət mərkəzində olub. Elm və təhsil sahələrində
tədqiqatçı, müəllim və tələbə
mübadiləsi geniş vüsət alıb. Bu proseslərin
bir qismi dövlət sazişləri çərçivəsində
tənzimlənir. Xarici ölkələrdə kadr
hazırlığı məhz, Azərbaycanın xarici dilləri
mükəmməl bilən, informasiya-kommunikasiya
texnologiyalarından əla istifadə bacarıqlarına yiyələnən
və beynəlxalq təcrübəni yaxşı mənimsəyən
yüksək hazırlıqlı mütəxəssislərə
olan ehtiyacının qarşılanmasına xidmət edir. Gənclərimizin
xaricdə təhsil almasına ümummilli liderin göstərdiyi
qayğı bu gün də ölkə
başçısı İlham Əliyev tərəfindən
layiqli şəkildə davam etdirilir. Bu gün yüksək
bilik səviyyəsinə malik gənclərimizin
dünyanın nüfuzlu universitetlərində təhsil
alması və bir mütəxəssis kimi yetişməsi
üçün dövlət tərəfindən hər
cür şərait yaradılır".
E.Qasımovun dediyinə
görə, qloballaşma proseslərinin fəal
iştirakçısı olan Azərbaycanda iqtisadiyyatın
dünya iqtisadi sisteminin tərkib hissəsinə çevrilməsi
öz növbəsində yeni tipli iqtisadçı kadrlar
hazırlanmasına tələbat yaradır. Biliklərə əsaslanan
iqtisadiyyata transformasiya yolunda aparılan işlər informasiya
cəmiyyətinin tələblərinə uyğun yüksək
hazırlığa malik mütəxəssislərə
ehtiyacı artırıb. İnformasiya cəmiyyəti üzrə
ümumdünya sammitində ölkənin "qara
qızıl"ının insan potensialının gücləndirilməsinə
yönəldilməsi ilə bağlı Azərbaycanın
qaldırdığı problem informasiya texnologiyaları və
innovasiya sektorunda kadr hazırlığı işinin təkmilləşdirilməsini
zərurətə çevirib. E.Qasımov əlavə edib ki,
Dövlət Proqramı çərçivəsində təhsil
alanların seçim qaydaları, təhsil alanlar barədə
ictimaiyyəti məlumatlandırmaq, proqram çərçivəsində
xarici ölkələrin ali məktəblərindən məzun
olanların işlə təmin olunmaları məqsədi ilə
Təhsil Nazirliyi tərəfindən xüsusi sayt
yaradılıb. Bu veb-səhifədə Dövlət Proqramına
aid hüquqi-normativ sənədlər toplusu, "Seçim
qaydaları"na uyğun müvafiq olaraq xarici ölkələrin
ali məktəblərinə qəbul haqqında elanlar yerləşdirilir.
Gənclərin təhsil aldıqları ölkə, ali məktəb,
ixtisas, təhsil pilləsi, təhsilə başlama və məzun
olma müddətləri haqqında, məzunlar və yaxın
müddətdə məzun olacaq tələbələr
haqqında ətraflı məlumatlar verilir. Eyni zamanda Dövlət
Proqramı ilə əlaqədar Təhsil Nazirliyinə
müraciət edənlər üçün saytda xüsusi
guşə var. Nazir müavini bildirib ki, xarici ölkələrdəki
gənclərimiz təhsil almaqla yanaşı, həm də Azərbaycan
xalqının təmsilçisi, onun qədim mədəniyyətinin,
adət və ənənələrinin təbliğatçılarıdırlar.
Buna görə də xarici ölkələrin aparıcı
ali məktəblərində təhsil almaq üçün tələbələrin
seçilməsi, ixtisaslarının müəyyənləşdirilməsi
və onlara təhsil almaq üçün lazımi şəraitin
yaradılması mühüm əhəmiyyətə malik məsələdir.
Çıxışının sonunda E.Qasımov xaricdə təhsil
almağa gedən tələbələrə uğurlar diləyib,
onların vətənə layiqli mütəxəssis kimi
dönməsini arzulayıb.
Tədbirdə
çıxış edən İqtisadi İnkişaf Nazirliyi
və Dövlət Neft Fondunun nümayəndələri
dünyanın nüfuzlu ali məktəblərində təhsil
almaq imkanı qazanan tələbələrə, onların
valideynlərinə xoş arzularını
çatdırıb və ölkənin gələcək
inkişafında layiqli kadr kimi onların mühüm rol
oynayacağından söz açıblar. Onlar bildiriblər
ki, xaricdə təhsilini uğurla başa vurub vətənə
dönən hər bir gəncin həm İqtisadi
İnkişaf Nazirliyində, həm də Dövlət Neft
Fondunda çalışması üçün lazımi
şərait var.
Sonda xaricdəki ali məktəblərdən
məzun olan və Dövlət Proqramı çərçivəsində
təhsilə cəlb edilən tələbələr onlara
yaradılan bu şəraitə görə ölkə rəhbərliyinə
minnətdarlıqlarını bildirib, etimadı
doğrultmağa çalışacaqlarını bildiriblər.
Böyük Britaniyada
beynəlxalq biznes və menecment ixtisası üzrə
magistraturada təhsil almaq imkanı qazanan Səməd Səfərov
bildirib ki, 4 il bundan öncə Tələbə Qəbulu
üzrə Dövlət Komissiyası tərəfindən təşkil
edilən qəbul imtahanları nəticəsində Moskva
Dövlət Özəl Kimya və Texnologiya Akademiyasına qəbul
olunub: "Təəssüf ki, 4 il əvvəl "Azərbaycan
gənclərinin xarici ölkələrdə təhsili
üzrə Dövlət Proqramı" qəbul
olunmamışdı və bizim bu proqram çərçivəsində
xaricdə təhsil almaq imkanımız yox idi. Mən Moskvada
olan müddətdə tələbə yoldaşlarımdan
öyrəndim ki, Qazaxıstanda belə bir dövlət
proqramı mövcuddur. Bunu biləndən sonra
qazaxıstanlı tələbələrə qibtə ilə
baxırdım. Çox sevindirici haldır ki, artıq Azərbaycanda
da belə bir Dövlət Proqramı qəbul olunub və gənclərin,
o cümlədən mənim bu proqramdan bəhrələnmək
imkanım var. Bu imkanın yaradılmasında rolu olan hər kəsə,
xüsusən dövlətimizin rəhbərliyinə minnətdaram".
Sevinc QARAYEVA