Klassik əsər tələbə yozumunda

Vaxtilə Akademik Milli Teatrımızın səhnəsində Tofiq Kazımovun quruluş verdiyi və bu gün də adı dillərdə gəzən V.Şekspirin "Antoni və Kleopatra" faciəsinə bir daha qayıtmaq rejissordan cəsarət tələb edir. Azərbaycan Dövlət Mədəniyyət və İncəsənət Universitetinin "Teatr rejissorluğu" kafedrasının dosenti Yaqut Mehdiyeva bu cəsarəti özündə tapdı, çalışdığı təhsil ocağının tələbə və müəllim heyətinin yaradıcılıq-ifa işi kimi orijinal yozumda maraqlı bir səhnə əsərini meydana çıxara bildi.

Yaqut xanımın öz sözüdür ki, əsas problem baş rolları - Mark Antoninin, Kleopatranın obrazlarını yarada biləcək aktyor - tələbələri tapmaq idi. Axı bu günə qədər tamaşaçıların yaddaşında bu rolların klassik ifaçıları olan Hökümə Qurbanova ilə Əli Zeynalov yaşamaqdadır. Əslində, bu tamaşanı səhnəyə gətirmək ideyasını rejissorda doğuran səbəb də elə məsələnin bu tərəfi idi: Azərbaycan Dövlət Mədəniyyət və İncəsənət Universitetinin müvafiq ixtisas üzrə təhsil alan tələbələri arasında belə ağır yükü daşıya biləcək istedadlar olacaqmı? Axtarışlar uzun çəksə də öz bəhrəsini verdi.

Bu gün ADMİU fəxr edə bilər ki, sözün həqiqi mənasında geniş tamaşaçı kütləsinin qarşısına çıxarıla biləcək, artıq böyük səhnələr üçün püxtələşmiş, dünyaca məşhur Şekspir faciəsinin Pərvin Əzrənalıyev (Kleopatra), Daşqın Piriyev (Mark Antoni), Anar Səfərov (Sezar), Natəvan Bəşirova (Oktavia), Mahi Səfərova (Xarmiana), Rəşad Nuriyev (Tirey), Əhliman Ərşadov (Aleksas) kimi ən mürəkkəb obrazları yaratmaq gücünə malik gənclər məhz bu təhsil ocağının yetişdirmələridir.

Universitetin Tədris teatrında tamaşanı izləyib zəngin təəssüratla zalı tərk edən tamaşaçıların yekdil istəyi bu idi ki, əsər elə Yaqut Mehdiyevanın quruluşunda, həmin yaradıcı qrupun iştirakı ilə respublikamızın aparıcı teatrlarının səhnələrində göstərilsin.    

Gündüz ƏLİYEV

525-ci qəzet.- 2009.- 5 iyun.- S.7.