Yazıçılar Birliyində Natiq Rəsulzadənin 60 illiyi qeyd edilib
Dünən Azərbaycan Yazıçılar
Birliyində (AYB) tanınmış
yazıçı, əməkdar
incəsənət xadimi
Natiq Rəsulzadənin
60 illik yubileyi ilə bağlı tədbir keçirilib.
Yubiley mərasimini
giriş sözüylə
açan AYB-nin katibi, xalq yazıçısı
Çingiz Abdullayev N.Rəsulzadənin həyat
və yaradıcılığının
bir sıra önəmli məqamları
barədə məlumat
verib. Yubilyarın qırx ildən artıqdır ki, bədii yaradıcılıqla
fəal məşğul
olduğunu, həm ölkə, həm də dünya miqyasında istedadlı bir yazıçı kimi tanındığını
bildirib. Ç.Abdullayev
həmkarının Azərbaycan,
Rusiya, Polşa, Macarıstan və başqa ölkələrdə
nəşr edilmiş
otuzdan artıq kitabın müəllifi olduğunu deyib. Yubilyarın bugünlərdə ölkə
prezidenti tərəfindən
"Şöhrət" ordeni
ilə təltif edilməsinə çox sevindiyini dilə gətirən AYB katibi hələ gənclik çağlarından N.Rəsulzadənin
kitablarını həvəslə
oxuduğunu, onun əsərlərinin etirazçı
ruhunun, hər cür ətalətə qarşı çıxışının ürəyincə olduğunu vurğulayıb.
N.Rəsulzadəylə uzun
illərdir dostluq etdiyini diqqətə çatdıran Ç.Abdullayev
onu çağdaş
gerçəkliyini çox
həssaslıqla duyan,
dərin düşüncəli
yazıçı kimi
səciyyələndirib.
AYB-nin sədri, xalq
yazıçısı Anar N.Rəsulzadəninin əsərlərinin
bir qayda olaraq səngiməyən maraqla oxunduğunu önə
çəkib. Anar ədibin "İntihar edənin gündəliyi",
"Gecə çaparı" əsərlərində
oxucunu əsər boyu sürətlə inkişaf edən
olayların gələcək gedişatının gərgin
intizarında qoyduğunu və bunu çox məharətlə
bacardığını vurğulayıb. N.Rəsulzadənin
nəsrinin fəlsəfi və sənətkar ümumiləşdirmələrilə,
çağdaş dövrümüz, insan münasibətləri
haqqında səhih düşüncələrlə zəngin
olduğunu bildirən Anar onu yubileyi münasibətilə təbrik
edib.
Yazıçı-publisist,
millət vəkili Elmira Axundova N.Rəsulzadə ilə 30 il əvvəl
birgə işlədiyi dövrə aid xatirələrini tədbir
iştirakçıları ilə bölüşüb. Onun
həm yaxşı yazıçı, həm də sədaqətli
dost olduğunu bildirən millət vəkili yubilyarın əsərlərinin
xüsusiyyətlərindən də söz açıb:
"Təəssüf ki, Natiqin əsərlərində
çox vaxt şər xeyir üzərində qələbə
çalır, intellekt bəzən
naşılığın, cahilliyin kölgəsində
qalır. Amma bununla belə, Natiq Rəsulzadə əsərlərindəki
görünməyən inam və ümidlə həyat həqiqətlərini
oxucuya bədii, oxunaqlı, gözəl dillə
çatdırır, bu səbəbdən də
yazıçı kimi çox sevilir".
Kino xadimi Cəmil Quliyev
N.Rəsulzadənin ssenariləri əsasında çox
maraqlı və tamaşaçılar tərəfindən rəğbətlə
qarşılanan filmlərin
ekranlaşdırıldığını deyib: "Natiq Rəsulzadənin
ssenarilərinə çəkilmiş "Mələklərə
inanmayın", "Yağışlı bayram",
"Yaşa, qızıl balıq", "Vahimə",
"Sifarişçi", "Gecə qatarında qətl",
"Ovsunçu", "Biz qayıdacağıq" kimi
filmlərə tamaşaçılar böyük maraqla
baxır və bu ekran əsərlərini sevirlər". C.Quliyev
N.Rəsulzadənin müxtəlif illərdə satirik
"Mozalan" kinojurnalı üçün
yazılmış onlarla maraqlı süjetin müəllifi
olduğunu da xatırladıb.
Xalq artisti Həmidə
Ömərova, memar Elbəy Qasımzadə və
başqaları çıxışlarında N.Rəsulzadənin
əsərlərində ortaya atılan problemlərin bədii
həllinin uğurla qələmə alınmasından, onun
yazıçı istedadından əlavə, həm də
yüksək insani keyfiyyətlərə malik olduğunu, dəyərli
pedaqoq kimi tanındığını diqqətə
çatdırıblar.
Sonda
çıxış edən yubilyar
yaradıcılığına göstərilən diqqətə,
haqqında söylənilən fikirlərə, səmimi
çıxışlara görə mərasim
iştirakçılarına minnətdarlığını
bildirib.
Sevinc MÜRVƏTQIZI