"Sevən qadın"ın təqdimatı uğurla keçib
AZƏRBAYCAN SƏHNƏSİ DAHA
BİR MARAQLI TAMAŞA QAZANIB
Görkəmli
yazıçı-dramaturq Əli Əmirlinin "Sevən
qadın" pyesi əsasında hazırlanan tamaşanın
bugünlərdə premyerası keçirilib. Əsər
tanınmış əməkdar incəsənət xadimi Bəhram
Osmanovun quruluşunda səhnə həllini tapıb. Ədəbiyyatın
ən çox müraciət edilən mövzularından olan
qadın həmişə yazıçı və şairlərin
diqqət mərkəzində dayanıb. Ə.Əmirlinin əsəri
üzrə B.Osmanovun təqdim etdiyi qadının ən
başlıca özəlliyi də onun sevməsidir. Tamaşanın
baş obrazı dəlicəsinə sevən, həm də
kimi, necə, niyə sevdiyinin fərqinə varmadan aşiq olan
məşhur və gözəl aktrisa Elminadır. Əri və
bir oğlu olan Elminanın həyatında zəngin iş
adamı Qalib də görünəndə və qadın dəlicəsinə
ona aşiq olanda tamaşada hadisələr gərginləşir.
Əvvəlcə Qalibin zənginliyinə, puluna vurulan Elmina
sonralar onun özünə də bağlanır. Bu
bağlılıq hətta itaət səviyyəsinə
çatır. Onu həqiqətən sevən Elmina həm də
başa düşür ki, onun sevgisini pula satın alıblar.
Ancaq məhəbbətinin dərəcəsi ona bu barədə
dərindən düşünməyə imkan vermir. Aktrisa
öz itaətindən, bağlılığından həzz
ala-ala beş il beləcə ömür sürür. Dörd
dəfə ərə gedən anasının yolunu davam etdirən
Elmina bu dəfə həqiqətən vurulsa da, Qalibin hissləri
ötəri olur. Və o, Elminanın həyatından gəldiyi
kimi də çıxıb gedir...
Ə.Əmirlinin
müraciət etdiyi mövzunun əbədi
aktuallığı maraqlı süjetlə, hadisələrin
ardıcıllığı ilə uyuşaraq, maraqlı səhnə
əsərinin meydana çıxmasına səbəb olub. B.Osmanov
bu dəfə də rejissor məharətini ortaya qoyub və
"Sevən qadın" maraqlı yozumda ərsəyə gəlib.
Tamaşada Elminanı canlandıran Sənubər İsgəndərovanın
canlı plastikası, təbii oyunu, yumoristik ifa tərzi
tamaşanı daha da baxımlı edib. Cəmi 4 aktyorun
ifasında təqdim olunan tamaşa az sayda obrazın
iştirakına baxmayaraq, çox canlı və maraqlı
alınıb. Elminanın rəfiqəsini oynayan Mehriban
Xanlarova, Qalib və müxbir rollarını ifa edən
Füzuli Hüseynov, aktrisanın anasını təcəssüm
etdirən Laləzar Mustafayevanın ifası da dolğun və
baxımlıdır. Qeyd olunan məziyyətləri və digər
müsbət cəhətləri deməyə əsas verir ki,
"Sevən qadın" hələ uzun müddət
tamaşaçıların rəğbətini qazanmaqla
repertuarda üstün mövqeyini qoruyacaq.
SARA