Gürcüstanda Azərbaycan Mədəniyyəti Günləri olacaq

İyunun 16-da Gürcüstanda Azərbaycan Mədəniyyət günlərinə start veriləcək. Mədəniyyət və turizm naziri Əbülfəs Qarayevin rəhbərlik edəcəyi 90 nəfərlik nümayəndə heyətinin iştirakı ilə keçiriləcək təntənəli açılış mərasimi iyunun 16-da Tbilisi Dövlət Opera və Balet Teatrında gerçəkləşəcək. Mədəniyyət və Turizm Nazirliyindən verilən məlumata görə, nümayəndə heyətinin tərkibinə xalq artistləri Teymur Göyçayevin bədii rəhbəri və baş dirijoru olduğu Dövlət Kamera Orkestri, Afaq Məlikovanın rəhbərliyi ilə Dövlət Rəqs Ansamblı, Rauf Babayevin "Qaya" ansamblı, eləcə də Dövlət Pantomima Teatrının Kollektivi daxildir. Heyətdə Salman Qəmbərovun "Bakustik-caz" qrupu, Ənvər Sadıxovun ansamblı, solistlərdən vokal ifaçıları Samir Cəfərov, İnarə Babayeva, muğam ifaçıları Təyyar Bayramov, Vəfa Orucova, tarzən Elçin Həşimov, kamança ifaçısı Elnur Əhmədov, aşıq Samirə Əliyeva da olacaq. Mədəniyyət günləri çərçivəsində gürcü tamaşaçılar fotoqraf və rəssamlarımızın əl işlərindən ibarət müasir incəsənət sərgisi ilə tanış olmaq imkanı əldə edəcəklər.

Nümayəndə heyətimizin həmçinin Bolnisi və Rustavi tamaşaçıları qarşısında da çıxış etməsi planlaşdırılıb.

Silsilə tədbirlər çərçivəsində iyunun 18-də Azərbaycan-Gürcüstan Hökumətlərarası Komissiyasının ölkəmizdəki Gürcüstan xadimlərinin muzeyləri, mədəniyyət mərkəzi və dövlət teatrı, eləcə də qonşu ölkədə olan görkəmli azərbaycanlıların muzeyləri, mədəniyyət mərkəzi və dövlət teatrının fəaliyyəti üzrə alt komissiyasının birinci iclası da keçiriləcək. Mədəniyyət günləri iyunun 20-də başa çatacaq.  

SARA

525-ci qəzet.- 2009.- 12 iyun.- S.7.