"Dədə Qorqud"la bağlı "Türk-sovet kollokviumu"nun 20 illiyi qeyd
olunub
YUBİLEY MÜNASİBƏTİLƏ BAKI SLAVYAN
UNİVERSİTETİNDƏ MARAQLI TƏDBİRLƏR
KEÇİRİLİB
İyunun 20-də
Bakı Slavyan Universitetində (BSU) "Kitabi-Dədə
Qorqud" dastanlarına
həsr edilmiş
"Türk-sovet" kollokviumunun
20 illik yubileyi ilə bağlı dəyirmi masa keçirilib. Tədbiri giriş sözü ilə açan BSU-nun rektoru Kamal Abdulla
çıxışında iyirmi il əvvəl
Azərbaycanın ictimai-mədəni həyatında
hadisəyə çevrilən,
ilk dəfə olaraq keçirilən kollokviumun əhəmiyyətindən
danışıb. K.Abdulla sovet
rejiminin son dövrünə təsadüf
edən bu əlamətdar hadisənin
hələ o vaxtdan möhkəmlənməkdə
olan və müstəqillik dövründə
daha da inkişaf
edən Azərbaycan-Türkiyə dostluğu, qardaşlığının əbədiliyinə
sübut kimi dəyərləndirib: "İlk
mənəvi-elmi körpü
rolunu oynayan kollokviumda o günə qədər
"Kitabi Dədə-Qorqud"u ayrı-ayrılıqda tədqiq edən rusiyalı, türkiyəli, azərbaycanlı,
türkmənistanlı, qazaxıstanlı
filoloqların bir araya gəlməsi tədbirin qiymətini yalnız elm adamları arasında deyil, geniş ictimaiyyət arasında da yüksəklərə
qaldırdı. Bu hadisə ölkədə
də geniş rezonans doğurdu". Qeyd edək ki, həmin
tədbirdə Orxan Şaiq Gökyay, Bahəddin Ögəl, Əhməd Bican Ercilasun, Osman Fikri Sərtqaya, Fikrət Türkmən, Saim Sakaoğlu, Tuncər Gülənsoy, Tofiq Məlikli, Aydın Məmmədov, Tofiq Hacıyev, Süleyman Əliyarlı,
Kamil Vəliyev, Kamal Abdulla, Şakir İbrayev, Xalıq Koroğlu, Erden Kajıbayov, Süleyman Qayıpov, Annaqurğan Aşırov kimi görkəmli alimlər iştirak ediblər.
K.Abdulla aradan ötən
iyirmi illik zaman kəsiyində o zaman əsası qoyulan
birliyin, elmi-mədəni əməkdaşlığın
virtual müstəvidən reallığa çevrildiyini
önə çəkib: "Bu əməkdaşlıq Dədə
Qorqud mətnlərini dərindən öyrənməklə
yanaşı, eposun bir-birinə bağladığı
türk xalqlarının müasir dövrdə də yaxınlaşması
və daimi əməkdaşlıq perspektivlərinin
müzakirəsi baxımından da çox
faydalıdır".
Tanınmış
qorqudşünaslardan bəziləri dünyasını dəyişsə
də, tədbirdə 20 il əvvəlki heyətdən Əhməd
Bican Ercilasun, Osman Fikri Sərtqaya, Fikrət Türkmən,
dosent Ayşə Yücəl Çətin, professorlar Tofiq Məlikli,
Tofiq Hacıyev, Süleyman Əliyarlı kimi nüfuzlu alimlər
iştirak edib. Osman Fikri Sərtqaya "Dədə Qorqud"a
istinadən, simvolik adlarla kollokvium iştirakçılarını
salamlayıb.
Əhməd Bican
Ercilasun çıxışında Azərbaycana olan sevgisini
dilə gətirərək kollokvium
iştirakçılarının yenidən bir arada
olmasından məmnunluğunu ifadə edib və tədbirin əhəmiyyətini
vurğulayıb.
Professor Süleyman Əliyarlı
hələ sovet rejiminin mövcud olduğu bir vaxtda kollokviumun
mürəkkəb, çətin şəraitdə gerçəkləşdiyini,
həmin dövrdə iştirakçıların sovet
xüsusi xidmət orqanları tərəfindən nəzarətdə
saxlanıldığını deyib, xatirələrini tədbir
iştirakçıları ilə bölüşüb.
Tofiq Hacıyev, Ayşə
Yücəl Çətin, Tofiq Məlikli, Fikrət Türkmən,
Rəhilə Qeybullayevanın çıxışlarında
qorqudşünaslığın aktual problemləri diqqət mərkəzinə
çəkilib. Tədbirə qonaq kimi qatılan Ankara
Universitetinin rektoru Camal Tuluğ belə mötəbər bir mərasimdə
iştirakından məmnun olduğunu dilə gətirib.
Günün ikinci
yarısında kollokviumun üzvləri BSU-nun müxtəlif
auditoriyalarında ustad dərsləri veriblər. Dərslərdə
professorlar Fikrət Türkmən "Dədə Qorqud"da
gələnəksəl xalq hüququ ünsürləri",
Əhməd Bican Ercilasun "Dədə Qorqud kitabı
hansı irsdən qaynaqlanır", Tofiq Məlikli "Dədə
Qorqud kitabının ortaq türk ədəbiyyatının
inkişafına təsiri" mövzusunda mühazirələrlə
çıxış ediblər.
Kollokviumun nəzərdə
tutulan ikigünlük tədbirləri çərçivəsində
BSU-nun mərkəzi qiraətxanasında
iştirakçıların iyimi il ərzində işıq
üzü görən kitablarının təqdimatı olub. Təqdimat
mərasimində çıxış edənlər bu kitablar
vasitəsilə ötən iyirmi ildə görülən
işlər, yeni tədqiqatlar, yeni baxışlarla
tanış olmaq imkanı yarandığını
vurğulayıblar.
Kitabların təqdimatından
sonra kollokvium iştirakçıları BSU-nun müəllim
və tələbə heyətilə, həmçinin
oxucularla görüşüblər. Ötən gün
kollokviumun yekunu ilə əlaqədar universitetdə mətbuat
konfransı keçirilib. Jurnalistlərin suallarını
cavablandıran kollokvium iştirakçıları iki gün ərzində
türk dünyasının müdriki Dədə Qorqudun ruhunu
yad etməklə bərabər, milli-mənəvi dəyərlərimizin
qorunub saxlanılması və təbliği yönündə
faydalı fikir mübadiləsi apardıqlarını bildiriblər.
S.MÜRVƏTQIZI