Mücirəddin Beyləqani yurdundan
minnətdarlıq dolu
əks-səda
Beyləqan rayonundan olan bir qrup
ziyalı adından, qəzetimiz vasitəsilə,
Nizami Gəncəvi adına Milli Azərbaycan Ədəbiyyatı
Muzeyinin direktoru,
professor Rafael Hüseynova məktub
ünvanlanıb. Məktubda
bildirilir:
Hörmətli professor,
Beyləqan ziyalıları adından səmimi
salamlarımızı qəbul etməyinizi xahiş edirik! Milli-mənəvi
dəyərlərimizin qorunması, ədəbiyyat və mədəniyyətimizin
inkişafı, təbliği, tədqiqi sahəsində bir
alim kimi Sizin müstəsna xidmətləriniz təqdirəlayiqdir
və ictimaiyyət tərəfindən həmişə rəğbətlə
qarşılanmışdır. Sizin "525-ci qəzet"in
11 aprel 2009-cu il tarixli sayında dərc etdirdiyiniz
"Özünü qoruya bilməyən qoruyucu" adlı
elmi-publisistik məqaləniz Beyləqan ziyalıları tərəfindən
yüksək qiymətləndirilmiş və bu yazı
rayonumuzun 70 illik yubileyinin qeyd edilməsinə
başlanıldığı bir zamanda görkəmli həmyerlimiz
Mücirəddin Beyləqani haqqında fikir söyləmək
imkanımızı genişləndirmişdir.
Hörmətli Rafael
müəllim, məqalənin müqəddiməsindəki
kövrək ifadələr bizləri də mütəəssir
etməyə bilməzdi. Düz 70 il qutularda bükülü
qalmış Örənqaladan gətirilmiş daş,
kaşı, saxsı parçalarını açıb tədqiq
etdikcə Sizin böyük şairimiz M.Beyləqanini dindirmək
ehtiyacınız, onun haqqında yeni fikirlər söyləməyiniz
biz ziyalıları da sevindirdi və Sizə sonsuz təşəkkür
və minnətdarlıqlarda dolu olan bu kiçik məktubu
ünvanlamağa vadar etdi. Və bir də ona görə
sevindik ki, 70 yaşlı "bələyi açılan
körpə"nin qığıltı və təbəssümü
Beyləqan rayonunun 70 illik yubileyi tədbirlərinə xoş
bir ovqat bəxş edə bilər. 70-lər arasında olan bu
paralellik bir təsadüfmü, yoxsa yubiley ərəfəsində
M.Beyləqani ruhunun sevimli alimimiz R.Hüseynov ilhamına
telepatik bir diktəsimi?.. Allah bilir...
Hörmətli Rafael
müəllim!
Rayon mərkəzində
Beyləqanın keçmişini və bu gününü əks
etdirən, müasir tələblərə cavab verən
Tarix-Diyarşünaslıq Muzeyi
açılmışdır. Sizin dəyərli məqaləniz
də muzeyin eksponatları sırasına daxil edilmişdir.
Yubiley günlərinin gedişində Sizi beyləqanlıların
görüşünə dəvət etmək niyyətindəyik.
Eyni zamanda, xahiş edərdik ki, yenicə işıq
üzü görmüş Örənqala eksponatlarından
bizim muzeyə də verilməsinə köməklik göstərəsiniz.
Bir daha Sizə minnətdarlığımızı
bildiririk.
Hörmətlə:
Etibar İMANOV (filoloq) və
Mehriban İSGƏNDƏROVA
(Beyləqan rayon Tarix-Diyarşünaslıq Muzeyinin direktoru)
18 iyun 2009-cu il
525-ci qəzet.- 2009.- 23 iyun.- S.7.